CMB gibanhaw sa kagamhanan sa Dakbayan sa Sugbo

CEBU, Philippines — Human nga nahilom sulod sa taas nga katuigan gibanhaw sa kagamhanan sa Siyudad sa Sugbo ang Coastal Management Board (CMB) ug gihimo kagahapon diha sa Plaza Independencia ang pormal nga paglusad niini.

Matud sa chairman sa CMB Reymarr Hijarra nga mohimo og todo nga mga programa ang CMB alang sa kaayohan sa katawhan ilabi na sa coastal barangays.

Nagkanayon si Hijarra nga naumol na ang CMB niadtong tuig 2003 ubos sa paningkamot ni Mayor Michael Rama kinsa konsehal pa sa maong tuig.

“Sa giingon ni Mayor, mao na ni siya ang  pag-revive sa CMB, kay sa panahon man gud nga lahi na ang mayor niadtong 2016 kay wala nay activities ang CMB o nahilom gyud siya . Siguro lahi pod tingale ang priorities niadtong higayona”, matud ni Hijarra.

Gawas sa regular nga mga clean-up aduna pod sila’y livelihood programs alang sa mga residente sa coastal areas ingon man usab ang pagkab-ot sa hustong sanitation.

“Pipila sa nakalinya nato nga programa kay ang pagmentinar sa peace and order ug ang pagpaniguro nga makabaton og kaugalingong pansayan ang anaa sa coastal areas aron masiguro ang sanitation”, padayag ni Hijarra.

Si Hijarra nagkanayon nga aduna pod sila’y regular nga monitoring aron mamentinar  ang kalimpiyo sa dakbayan.

Atol sa pagtambong ni Mayor Michael Rama sa seremoniya kagahapo gipaambit  niya nga konsehal pa lang siya gisugdan niya ang mga programa alang sa paglimpiyo sa siyudad.

Iyaha kining gisugdan pinaagi sa nagkadaiyang area sa city hall hangtud gi-level sa tibuok siyudad lakip na ang coastal areas.

Naglaom ang mayor sa kooperasyon sa katawhan alang sa mga porograma sa siyudad ilabi na ang kabahin sa kalimpiyo.  -  BDB (BANATNEWS)