Call center agent gipatay

CEBU, Philippines — Patay ang usa ka call center agent sa dihang kini gipaulanan og bala samtang sakay og e-trike diha sa dalan Tabada sa Barangay Mambaling sa Dakbayan sa Sugbu kagahapon sa alas-6 sa gabii.

Ang namatay nakuhaan og ID sa usa ka BPO nga nagdala sa pangalang Redjie Kyle Barquero. Ang biktima giingong nagpuyo na sa dakbayan sa Talisay apan magbisitahan sa iyang anak diha sa maong barangay.

Matud pa ni Patrolman Glendel Cabañero, ang biktima luwan sa maong e-trike sa dihang kalit kining gisugat og riding in tandem ug walay daghang pangutana gipaulanan kini og bala.

Ang nabiktima naigo sa ulo ug sa likod nga bahin sa lawas nga maoy nakaingon sa iyang hinanaling kamatayon.

Ang e-trike driver nga si Roland Lanit miingon nga misakay kaniya ang  biktima diha sa Alumnus aron magpahatud sa Tabada, apan mibalik sila sa agi kay nakalimtan niini iyang sunglasses.

Apan didto nila nasugatan ang riding in tandem, ang backrider matud maoy giingong mipusil sa biktima.

Gisusi karon sa kapolisan ang matud pa mga report nga duna kini mga nakaengkwentro kaniadto sa lugar.  Matud pa sab sa usa sa mga tanod nga miresponde sa crime scene dunay mga reklamo batok sa biktima nga naabot diha sa barangay apan di kini kahatag og kompletong impormasyon bahin niini.— /IBM (BANAT NEWS)