Fastcraft nabanggaan

CEBU, Philippines —  Nangaangol ang wala pa matinong gidaghanon sa mga pasahero sa usa ka fastcraft human gikatahong nabanggaan kini og cargo vessel samtang sila padung sa Dakbayan sa Sugbo kagahapon, Domingo sa hapon diha sa kadagatan sa Mactan Channel.

Usa sa mga pasahero  sa Super Cat nga nakahinabi sa Banat News sa telepono mao si Atty. Erwin Nuñes miingon nga gikan sila sa Ormoc  City paingon sa Dakbayan sa Sugbo.

Matud pa sa dihang naa na sila sa kadagatan sa habig sa Sugbu (wala siya makahibalo kun asa gyud lugara) nabantayan nila nga nabangaan sila og usa ka cargo ship.

Tungod sa kakusog sa impact, nanggalagpot sila gikan sa ilang nahimutangan, gani hasta ang mga lingkuranan nga nangalangkat paabante hinungdan sa pagkapakong ug pagkalamba sa mga pasahero ug nangaangol.

Si Nuñes mibanabana nga ang insidente nahitabo pasado alas 2:47 sa hapon.  Si Nuñes nakaangkon og pangos tuo nga tuhod ug siko ingon man nagsakit iyang wala nga paa.

Nasagmuyo si Nuñes nga naabtan pa og kapin usa ka oras ayha pa naabot ang rescuers.

Base sa pasiunang report gikan sa Philippine Coast Guard in Ormoc (PCG-Ormoc) ang fast craft nga gipanagiya sa SuperCat Ferry Corporation dunay sakay nga 185 ka pasahero.

Sa interbyu kang Petty Officer Third Class Benjamin Jardy Vargas sa GMA-7 Balitang Bisdak, ang fastcraft gikan sa Ormoc City, Leyte nga dunay 185 ka pasahero padung sa Cebu City, samtang ang nabangga kanila padung sab sa Ormoc City. Gikataho sab nga pasado alas-12 sa udto kini mibiya ug gikatakda untang moabot sa Pier 1 sa Cebu City pasado alas 2 sa hapon.

Matud pa pagabot sa Marcelo Fernan Bridge nadasmagan kini og usa ka cargo vessel. Bisan ang mga pasaherong naglingkod sa tungatungang bahin sa fastcraft nakabatyag gyud sa pagbangga.

Base sab sa inisyal nga impormasyon nga gihatag ni Vargas, giingong nagkaproblema ang timon sa fastcraft nga gidasonan sab sa pasaherong abogado.

“Naay membro sa barko ako gipangutana unsay nahitabo niingon siya nabangga pagka human niingon siya nga ni malfunction kuno ilang steering wheel ako siya gipangutana kinsa iya pangan pero niingon siya nga Chief Mate kuno siya dire,” matud ni Nuñez.

“Ako siya gipangutana kanus-a ni malfunction during sa incident, during sa pagka bangga or after, ingon siya before sa panghitabo,” dugang pa ni Nuñez. Ang fastcraft giguroy sa tugboat padung sa Pier 1 samtang gihatagan og first aid ang mga nangaangol nga pasahero.

Atol ning pagsulat sa balita alas-8 sa gabii, wala pay gihatag nga opisyal nga impormasyon ang PCG Central Visayas (PCG-7. (BANAT NEWS)