Factory worker gipusil patay  sa Mandaue

CEBU, Philippines — Patay ang usa ka factory worker nga gipusil alas 6 pasado ang takna sa miaging Miyerkues sa gabii sa Barangay Maguikay sa Siyudad sa Mandaue.

Si Police Corporal Antonio Luicero, desk officer sa kapolisan sa Presintop 4 sa Mandaue City Police Office (MCPO) miila sa biktima nga mao si Ricardo Alanic Yara Jr., 26 anyos nga lumad nga taga Barangay Talaga sa Lungsod sa Alegria,Cebu.

Giila ang suspetsado nga mao si Calebo Alerta nga giingong guwardiya sa gitrabahoan niining pabrika.

Sa imbestigasyon nga gihimo sa kapolisan maoy nasayran nga gikalalis na sa suspetsado ang biktima tungod sa giingong pagpanginlabot niini sa iyang trabaho.

Matud pa wala makapugong sa iyang kasuko ang suspetsado maoy hinungdan nga iyang napusilan ang biktima nga si Yara.

Mitahan ang suspetsado ngadto sa kapolisan ug kasamtangan karon nga gibalhog sa bilangguan. (BANAT NEWS)