50 ka sakong basura nahipos sa coastal clean-up
CEBU, Philippines — Nakahipos og 50 ka sakong basura ang gipahigayong nga coastal clean-up sa Barangay Pangan-an, sa Isla sa Olango.
Ang maong coastal clean-up gisalmotan sa lainlaing ahensiya sa kagamhanan nga gipangulohan sa buhatan sa City Environment and Natural Resources, Lapu-Lapu City Police Office (LCPO) Maritime Police, Department of Interior and Local Government (DILG) uban usab sa mga opisyal sa barangay Pangan-an.
Ang hepe sa CENRO nga si Dr Ronald Oporto niingon nga kini ilang gihimo tungod usab sa kamandoan ni Mayor Junard "Ahong" Chan nga himoon gayod ang pagpanglimpiyo sa tanang dapit sa Isla sa Olango.
Nagplano usab sila nga himoon nga regular nga kalihukan ang pagpahigayon og clean-up sa barangay Pangan-an.
Gitug-an ni Oporto nga kadaghanan sa mga basura nga ilang nahipos mao ang mga plastics, ug ila kining dad-on ngadto sa Material Recovery Facility (MRF) sa siyudad diin adto i recycle ang mga basura.
Sa iyang bahin si Pangan-an Barangay Captain Vergilio Casiao miingon nga ilang hingusgan ang pag-awhag sa ilang mga konstituwente nga mag segregate sa ilang mga basura. (BANAT NEWS)
- Latest
