Rama miawhag sa VECO pagkuha sa poste sa may Freedom Park

CEBU, Philippines —  Subling nanawagan si Cebu City mayor Michael Rama sa Visayan Electric Company sa pagkuha sa poste nga nahimutang sa kanhi Freedom Park aron dili kini makaguba sa kaanindot sa lugar kun sa façade sa dapit.

Apil na niini ang nahimutangan sa simbahan sa Carmel nga naa sa University of San Jose Recoletos diha sa Carbon.

Ang panawagan sa mayor gihimo atol sa pagbukas sa The Barracks Warwicks ug Gabii sa Kabilin diha sa may kanhi Freedom Park.

Nagkanayon ang Mayor nga subli na usab siya manawagan sa VECO sa paghipos sa maong poste nga nahimutang sa maong dapit tungod kay makatabon kini sa orasan nga naa sa gawas sa simbahan ug makabati usab kini sa façade.

Dugang ni Rama nga angay lang gayud mapakita ang katahum sa maong simbahan ug dili usab kini makahatag ug kabati na unya sa freedom park.

Gisugyot niini nga karon na ang panahon nga wala na kaayoy makita nga mga poste o wire nga magbarug sa mga lugar ilabi na kung kini matahom nga dapit ug angayan nga ibutang na underground ang tanang mga wires.

Kahinumduman daan na nga gimando ni Rama sa mga hingtungdan nga ahensya sa paghipos sa maong mga poste dihang gibuksan na sa publiko ang Freedom Park. – MEL (BANATNEWS)