430 ka pamilya nakapahimulos sa Tabang Mandaue Program

CEBU, Philippines —  Nakadawat og P5,000 nga pinansiyal nga ayuda ang 430 ka pamilya sa Barangay Paknaan Siyudad sa Mandaue nga beneficiary sa Tabang Mandaue Program nga gipasiugdahan sa kagamhanan.

Midawat sa ayuda ang mga beneficiary sa Assistance for Individual in Crisis Situation nga giisip nga labing nanginahanglan sa tabang.

Si Mandaue City Mayor Jonas Cortes ug mga konsehales maoy mitunol sa maong pinansiyal nga ayuda.

Sa Barangay Paknaan maoy mitunol sa Tabang Mandaue Program sila si Bise-Mayor Glenn Bercede ug mga konsehales Maline Cortes-Zafra, Jen Del Mar, Cynthia Cinco-Remedio, Editha Cabahug,Jimmy Lumapas ug uban pa.  Samtang moabot sa 130 ka sako nga ginamit nga mga senina ang gipang apud-apod sa kagamhanan sa Minglanilla ngadto sa taga Barangay Cadulawan.

Kini pinaagi sa Municipal Social Welfare and Development Office pinangulohan ni Adalgesa Demoy.

Usa sa mga nakadawat mao si Mildred Taraya, kinsa nanginabuhi pinaagi sa paghimo og trapo.

Matud pa niya nga dako na kini og tabang para kanila aron makadaginot sa panapton nga himuon og trapo.

Ang ilang panginabuhian isip paghimo og trapo nagsugod niadto pang tuig 2017.

Si kapitan Boboi Geonzon sa Cadulawan maoy nangunay sa paghatag sa ginamit nga panapton.

Ang programa ubos sa liderato ni mayor Rajiv Enad nagtabang sa katawhan sa pagpalambo sa ilang panginabuhian. -  Gabriel C. Bonjoc, MEL (BANATNEWS)