P3 milyones gihatag sa Kapitolyo sa nisalmot sa Panagtagbo Festival

CEBU, Philippines — Moabot sa tulo ka milyon ka pesos (P3 million) ang gigahin sa Probinsya sa Sugbo isip financial assistance sa mga barangay o contingents nga niapil sa Panagtagbo Festival sa siyudad sa Mandaue. Gihimo ni Governor Gwen Garcia ang maong pamahayag atol sa showdown sa maong festival didto sa Mandaue City Cultural and Sports Complex niadtong May 6 diin walo ka mga clustered contigents gikan sa 27 ka barangay sa dakbayan ang niapil.

Matag contingent gilangkoban sa 100 ka mga performers.

Ang maong festival usa ka pasundayag nga nagsilbing reenactment sa panagtagbo sa Holy Family: Child Jesus, Mary ug Joseph kon diin ang maong panagtagbo nahimo na pud nga tradisyon matag Sinulog nga diin ang imahen ni Sr. Sto Niño ug Our Lady of Guadalupe sa Cebu City mobisita sa National Shrine of St. Joseph saMandaue.

“Makalipay kaayo kining nakita nato. Revival of culture, the revival of appreciation for our heritage. And now pride of place, pride in the City of Mandaue by our children and the youth” matud ni Garcia segun sa taho sa Capitol Information Office.

Ang maong festival nabalik human sa tulo ka tuig nga pagkahunong tungod sa pandemya sa coronavirus disease.

Nitambong sa maong kalihokan mao ang mga opisyal sa Mandaue gipangulohan ni Mayor Jonas Cortes uban nila ni Congresswoman Emmarie Ouano-Dizon, mga bokal nga sila Glenn Soco ug Jonkie Ouano ug uban pa.

Nasayran ang Hugpong sa Nagkahiusang Mananayaw nga gilangkuban sa mga performers gikan sa Barangay Canduman, Cubacub, Casili, Pagsabungan, ug Tawason ang midaug sa grand prize sa ritual showdown sa Panagtagbo Festival 2023 diha sa dakbayan sa Mandaue. /MEL (BANAT NEWS)