Natudlo nga pangu sa HRDO mohimo og kausaban

CEBU, Philippines — Bag-ong gitudlo nga pangu sa Human Resource Development Office (HRDO) sa Cebu City Hall, Henry Tomalabcab, adunay himoong kausaban sa pagdumala sa maong buhatan.

Lakip sa iyang palambuon mao ang sistema sa pagproseso sa sweldo sa mga empleyado ilabi na ngadto sa Job Order Employee.

Sumala pa ni Tomalabcab, nga angayan nga mahatagan og higayon ang tanang mga empleyado nga makaapil ug seminar aron mapalambo pa ang ilang kakayahan.

Nasayran kasagaran sa maka apil og mga seminar mao kadtong mga kawani sa City Hall nga dunay dagko og posisyon nga mao kanunay ang palargahon alang sa pagtambong og mga seminar.

Tinguha usab ni Tomalabcab, nga magbutang og mga tawo nga haum sa ilang posisyon sa trabaho.

Dugang pa niini nga karon sa iyang pagkatudlo makapaabot ang mga kawani sa City Hall nga patas ang iyang pagtrabaho diin mahimong wagtangon ang mga dili angayan sa serbisyo ug isalbar ang mga maayo o deserving nga mga kawani.

Hulipan ni Tomalabcab si outgoing HRDO Head Remie Vestil Mondigo. /MEL (BANAT NEWS)