Babaye patay sa hit and run

CEBU, Philippines — Patay ang 27-anyos nga babayeng samtang naangol ang kapuyo niini human ang ilang gisakyang motorsiklo napunggit sa dump truck nga mi overtake kanila diha sa M.C Briones St. Barangay Tabok sa Mandaue City kagahapon sa alas-3 sa kaadlawon, adlaw nga Martes.

Ang nakalas naila nga si Joann Madelo, 27, samtang naangol ang iyang kapuyo nga si Anjon Gulfan, 23,  nga maoy nagmaneho sa gisakyan nilang motorsiklo. Ang duha nagpuyo sa Lapu-Lapu City.

Samtang ang nakabangga kanila nga Isuzu dump truck gimaneho ni Ramelito Baculi, 44, taga Barangay Cantaw-an, Dakbayan sa Naga.

Base sa inisyal nga imbestigasyon ni Police Staff Sgt. Jimson Dapar, ang motor ug dump truck parehong nagsubay sa lane sa MC Briones Street gikan sa amihanan padung sa habagatan.

Apan pag-abot sa maong lugar gikatahong nitipas sa pikas lane si Baculi aron mo overtake apan sa pagbuhat niini napunggit niini ang motor sa duha.

Ang mga biktima parehong nangalabay sa karsada. Imbes nga mohunong aron tabangan ang mga biktima, mipasirit og padagan ang suspek apan gitabangan kini og gukod sa ubang concerned citizens nga mga nagmotorsiklo hangtud nga kini naapsan ug gidakop.

Ang mga biktima nakaangkon og kadaut sa kalawasan dali nga gipangdala sa tambalanan apan gideklarar nga dead on arrival si Madelo. Ang driver sa dump truck naa karon sa kustodiya sa kapulisan ug gipaabot nga pasakaan og kaso nga reckless imprudence resulting to homicide, serious physical injuries ug damage to property.— Rowena D. Capistrano ug Romeo Limpangog/IBM

Mga residente nahadok sa radiation sa tukorong cellsite

Usa ka dayalogo ug executive session ang mahitabo karong adlawa, Mayo 3, 2023  sa Konseho sa Siyudad sa Sugbo aron tukion ang gipadangat nga reklamo sa mga residente sa  Forest Hills, Banawa, Sitio Kalubihan, Barangay Guadalupe, sa Dakbayan sa Sugbo nga supak sa giingong gitukod nga cell site sa ilang dapit.

Nasayran nga pipila ka residente sa maong  dapit ang nidangop sa buhatan ni Konsehal Nestor Archival Sr. gumikan kay nabalaka sila sa padayon nga konstruksyon sa usa ka cell site tower sa usa ka kompanya sa ilang dapit.

Nahadlok matud pa ang mga residente sa ilang tan-aw negatibong epekto sa ilang panglawas ilabi na sa giingong radiation gikan sa maong cellsite ug uban pa.

Usa sa sutaon sa executive session mao ang taho nga giingong  wala mokuha og Barangay Clearance ang kontraktor ug wala usab kini nag-agi og public hearing.

Nagpadala na og komunikasyon ang mga residente sa maong Sitio ngadto kang Cebu City Mayor Michael Rama, Barangay Guadalupe Captain Michael Gacasan ug sa hepe sa Office of the Building Official nga si Architect Florante Catalan.

Ilang gikwestyon kun nganong gisugdan ang trabaho nga wala mosunod sa proseso sama sa pagkuha og work permits, Barangay Clearance, public hearing, ug  ocular inspection sa dapit.

Nagkanayon si Archival nga importante kaayo ang dayalogo aron mahatagan og katin-awan ang tanan.

Giimbitar sa maong dayalogo mao sila si Gacasan , Cataclan,representante sa buhatan sa mayor, kontraktor  ug mga apektadong residente gipangulohan sa usa ka Craig Ford. — IBM (BANATNEWS)