Adik kaniadto himuong fire volunteers sa Talisay

CEBU, Philippines — Nagtinguha ang kabumberohan sa Dakbayan sa Talisay nga himuong fire volunteers ang mga drug surrenderees.

Si Chief Insp. Alvin Torion, fire marshal sa Talisay nitataw nga kasagaran sa mga drug surrenderees mga professional ug siya sayangan nga di kini mapahimuslan.

Matud pa ni Torion nga iyang pakigkitaan unya si Dr. Rey Cesar Bautista, pangu sa aftercare program aron mahan-ay ang ilang plano.

Nagkanayon ang opisyal nga padayon ang ilang pagtudlo sa kabarangayan labot sa paglikay ug pagpawong sa kayo.

Gusto nila nga palapdan kini pinaagi sa pagtudlo sab sa mga drug surrenderees og firefighting skills.  Ang programa usa ka lakang nga mohaom sa programa sa ilang bag-o nga regional direktor.

Usa sab kini sa pag-agak sa mga nitipas sa ilang dalan kaniadto nga magtinarong sa kinabuhi ug makatabang pa sa komunidad.

Gani human sila mabansay mahimo nasab sila nga motudlo sa uban alang sa pagresponde sa mga panghitabo sa ilang lugar.

Sa pikas bahin, gibansaybansay sab sa kagamhanan  sa Siyudad sa Mandaue ang mga molupyo sa matag purok sa nagkadaiyang kabarangayan alang sa pagtubag sa alarma sa sunog, pagbaha  ug uban pa nga mga katalagman.

Si Buddy Alain Ybañez nga maoy pangulo sa Mandaue City Disaster Rsk Reduction and Management Office (CDRRMO) miingon nga gawas barangay disaster response teams  kinahanglang mabansay sab ang mga molupyo sa emerhensiya.

Nakaaghat kanila sa paghimo sa maong lakang human sa nahitabong sunog sa Sitio Tamarind sa Barangay Umapad nga dali kaayong napawong ang kalayo pinaagi sa pagtinabangay sa mga molupyo sa maong dapit.— Romeo Limpangog/IBM ( Banat News )