Mga mayor nga nitambong sa tigom hatagan og P2 milyon

CEBU, Philippines — Hatagan og tag P2 milyones nga incentive sa Kapitolyo ang mga mayor sa Probinsiya sa Sugbo kinsa nitambong ug nihuman sa Provincial Development Council (PDC) meeting niadtong Huwabes sa hapon.

Ang maong pundo magamit sa mga mayor sa mga proyekto sa imprastraktura nga gusto nila nga ipatuman sa ilang mga lungsod ug siyudad.

“Agi’g premyo ninyo tag P2 million mo, infra ha, infra”, matud ni Gobernador Gwendolyn Garcia atol sa maong tigom.

Ang provincial board members nga nitambong usab sa maong meeting hatagan usab og tag P2 milyones sa ilang Legislative Assistance Fund (LAF) ug dugang P1 milyon sa mga nitambong usab sa tigom sa gobernador uban sa regional directors ug representatives sa nagkadaiyang national line agencies niatong Abril 26, 2023 sa Kapitolyo.

Ang maong pundo gamiton usab alang sa ipatuman nga proyekto sa mga bokal sa ilang mga distrito.

Atol sa PDC meeting, gihisgotan sa mga mayor ug ni Garcia uban sa mga representante sa pipila ka regional offices sa national government agencies ang nagkadaiyang proyekto ug programa nga ipatuman karong tuiga ug pipila ka isyu apil niini ang cockfighting o tigbakay sa mga barangay, ang bag-ong gipalabang nga ordinansa sa provincial board pag-require sa national government agencies sa pagkonsulta sa probinsiya ug LGU sa dili pa mopatuman og mga programa ug proyekto niini.  – BDB (BANATNEWS)