Mga nakabalda sa sidewalk gub-on—Comar

CEBU, Philippines — Ang recovery sa sidewalk maoy usa sa mga nag-unang prayoridad sa bag-ong officer-in-charge sa Cebu City Prevention Restoration Beautification and Enhancement (PROBE) nga si Aderson Comar.

Si Comar nibahad nga tinud-on niya ang paghawan sa mga nakabalda sa sidewalk ug dili siya manumbaling sa mga materiyales nga nag-ali sa sidewalk tungod kay iyaha gyud kining gub-on.

Matud ni Comar nga 24/7 ang himuon niya nga monitoring ug nanghinaot siya nga mohatag og kooperasyon ang publiko.

Gikatahong pinasubay gihapon kini sa lapad nga kampaniya sa kagamhanan sa siyudad alang sa paghawan sa mga nakabalda sa kadalanan.

Nasayran nga bag-ohay lang nga nadawat ni Comar ang iyang bag-ong posisyon sa PROBE nga gipirmahan ni Mayor Michael Rama.

Nagsilbi si Comar kaniadto isip special projects assistant ni Rama ug nahimo usab nga hepe sa kabomberohan pipila ka tuig na ang nilabay.

Ug siya usab ang nagbansay-bansay kaniadto sa pipila ka emergency response training sa kabatan-onan. (BANAT NEWS)