Pagrehistro sa SIM dakong tabang sa kapolisan—Sucalit

CEBU, Philippines — Gihulagway ni Police Lieutenant Colonel Mark Gifter Sucalit, deputy provincial director for operations sa Cebu Police Provincial Office nga dako og tabang kanila ang sim   registration nga nag-require sa tanang sim card users nga mo-register sa ilang personal information sa telecommunications companies.

Matud ni Sucalit nga sa ka advance karon sa teknolohiya gipahimuslan usab kini sa mga kriminal sama sa paggamit og sim cards nga gigamit sa pagpang-scam ug uban pang pagpangilad.

Ang police stations sa CPPO nakadawat og reports mahitungod niining scam apan ilaha kining i-refer ngadto sa Regional Anti-Cybercrime Unit (RACU)-7. Si Sucalit nagkanayon nga pinaagi niining sim card registration mamenosan na unya ang pagpang-scam diin sa ilang ipahigayong imbestigasyon dali na nga matumbok ang mga responsable.

Napanglantawan usab sa kapolisan nga ang mga kriminal mangita gihapon og pamaagi aron makabiktima apan matud usab ni Sucalit nga sila sa kapolisan gipalambo ug gipalig-on pa nila ang ilang mga lakang aron mapakgang ang mga daotang plano sa mga badlongon sa katilingban.

Kagahapon unta ang deadline sa sim card registration apan si Presidente Ferdinand “Bongbong” Marcos Jr., niaproba sa 90-day extension sa sim card registration.

Gikabalak-an nga basin og pahimuslan usab kini sa kriminal hinungdan nga nanawagan ang kapolisan sa publiko nga magmabinantayon kanunay aron dili mabiktima sa mga daotang tawo. (BANAT NEWS)