Seaman nabiktima sa pagpanulis samtang naglakaw
CEBU, Philippines — Usa ka 36-anyos nga seaman ang nabiktima sa tulis kagahapon sa kadlawon diha sa T. Padilla Extension, Silangan II, Barangay Tejero, Siyudad sa Sugbo.
Ang biktima mao si Jonathan Adlawan, seaman, residente sa Barangay Cali-an, Lungsod sa Liloan, Southern Leyte.
Base sa report sa kapolisan sa Waterfront Police Station sa Cebu City Police Office nga ang biktima sakay sa barko nga nidunggo diha sa Pier 4 gikan sa Lungsod sa Hilongos, Southern Leyte kagahapon sa kadlawon.
Ang biktima samtang naglakaw paingon sa T. Padilla Extension giduol kini sa tulisan nga nagdala og hait nga hinagiban.
Nakuha sa tulisan ang mga gamit sa biktima nga gilangkuban sa pitaka nga adunay sulod nga P5,000, cellphone nga balor og P60,000, air pod nga nagkantidad og P8,000, ATM cards, driver’s license ug COMELEC ID.
Matud ni Police Major Efren Diaz, Jr., hepe sa Waterfront Police Station nga pasado alas 7:00 sa buntag kagahapon ang biktima ni-report sa police station ug nihimo dayon sila og follow up operation.
Sa maong follow up operation na-recover sa kapolisan ang mga gamit sa biktima apan ang tulisan nakaikyas human makabantay sa presensiya sa kapolisan.
Nailhan na sa kapolisan ang maong tulisan apan wala una ibutyag ang pangalan tungod kay nagpadayon pa ang ilahang pagpangita sa niini. (BANAT NEWS)
- Latest
