Tigbakay bawal gihapon kun way ordinansa
CEBU, Philippines — Gipasabot ni Police Colonel Ireneo Dalogdog, City Director sa Cebu City Police Office kaning tigbakay wala gyud gitugot sa balaod gawas lang sa mga legal nga cockpit arena.
Dugang ni Dalogdog nga bisan ang tigbakay panahon sa fiesta gidili sab kini gawas kun adunay ordinansa ang usa ka Local Government Unit nga nagtugot nga kini buhaton panahon sa fiesta.
“Bawal gyud gihapon na siya pero kung naa sila’y ordinansa nga i-allow nila na during fiesta wala tay mahimo kay naa man sila’y ordinansa pero og wala bawal gyud na, mao na mga fiesta unsa pa nga mga okasyon nga mogara pud ning mahilig sa manok kung wala’y mga kuan amo gyud na sila ipadakop,” pasabot ni Dalogdog.
Una niini, si Cebu City Councilor Pastor Alcover Jr., nagtinguha nga tukion ang legalidad sa mga pagpapahigayon og sabong sa kabarangayan ilabi na karon nga dahgang mga magsaulog sa kapistahan.
Usa ka executive session ang himuon karong Mayo 3, 2023 alang sa lapad sa nga diskusyon kabahin niini aron maklaro og unsay angayan nga klaruhon.
Sa umaabot nga executive session patambungon ang mga representante sa Cebu City Police Office, Cockpit Operators, mga mahiligon sa sabong, Cebu City Game Fowl Commission, Office of the Mayor ug Association of Barangay Councils.
Sa pagkutlo ning maong balita wala pa makadawat og imbitasyon ang Cebu City Police Office labot sa umaabot nga executive session apan sigon ni Dalogdog nga paminawon nila ang Cebu City Government kun unsay masabutan ug gusto nila nga mahitabo.— IBM (BANATNEWS)
- Latest
