Paglusad sa bag-ong rota sa barko gikan sa Liloan giuswag

CEBU, Philippines —  Giuswag ngadto sa laing petsa ang paglusad sa bag-ong rota sa biyahe sa barko gikan sa Lungsod sa Liloan padulong sa Isla sa Camotes.

Si Erik Lim sa Topline, operator sa Pier 88 sa Lungsod sa Liloan nagkanayon nga sa pagkakaron mabaw pa ang kondisyon sa tuibg diin moplastar ang barko ug maoy hinungdan nga lisod alang sa mga dagkong ro-ro sa Super Shuttle Ferry nga magkarga og pasahero, cargo, trucks ug bus gikan ug padulong sa Poro sa Isla sa Camotes.

Nangayo si Lim kang Garcia og upat ka semana nga extension o lugway aron makapahigayon og dredging sa tulo ka berthing space alang sa mga ro-ro vessel.

Apan si Garcia nagkanayon nga ulahi na ang paglusad sa maong rota kon kini ipahigayon sa kataposan sa bulan sa Mayo o sayo sa Hunyo gumikan kay dili na maapas niini ang summer season diin gipaabot nga daghang turista ang moadto sa Camotes Island aron mobakasyon.

“Make use of the momentum. Timing is everything in life”, matud ni Garcia ngadto kang Lim ug nimando nga paspasan ang dredging nga himuon aron mapaspasan ang paglusad sa bag-ong rota.  Samtang sa bahin sa Vallacar Transit Inc, Cebu North, si Atty. Moises Flores branch manager nitaho ngadto kang Garcia nga nakakuha na sila sa mga gikinahanglan nga permit gikan sa Land Transportation Franchising and Regulatory Board alang sa pagbiyahe gikan Cebu-Camotes nga rota sakay sa ro-ro nga pinaagi sa Liloan padulong sa Poro.  -  BDB (BANATNEWS)