Mga hepe sa CCPO gilahugay

CEBU, Philippines — Ang Cebu City Police Office nilahugay sa mga hepe sa kapolisan niini diin kagahapon sa buntag gipahigayon ang turnover ceremony. Ang hepe sa Police Station 1 Major Efren Diaz, Jr. mao na karon ang hepe sa Police Station 3 samtang ang hepe sa Police Station 3 Major Henry Orbiso mao na usab ang hepe sa Police Station 1.

Si Police Colonel Ireneo Dalogdog, direktor sa Cebu City Police Office nagkanayon nga ang reshuffling sa mga personnel normal kini nga proseso ug nasubay gihapon sa plans and programs ni PNP Chief General Rodolfo Azurin, Jr. tungod kay isip commanding officer anaa siya’y discretion nga mag-reassign sa station commanders base sa performance ilabi na sa efforts sa crime prevention ug crime solution. Hinuon giklaro ni Dalog nga atol sa performance review nga gihimo sa niaging semana nga gipangulohan ni Brigadier General Anthony Aberin, direktor sa Police Regional Office-7 nga ang police stations sa CCPO lakip sa best performing units.

Gibutyag ni Dalogdog nga padayon ang paghimo nila og reshuffling diin nagsige usab sila og evaluate sa performance sa ilahang mga personnel.

Gipasabot ni Dalogdog nga ang reshuffling wala kini nagpasabot nga bati tungod kay adunay panahon nga kinahanglan kining buhaton alang sa kalamboan sa career sa usa ka polis.

Sa paglingkod ni Diaz isip hepe sa Police Station 3 usa sa gimando ni Dalogdog kaniya mao nga tutokan ang bay walk area sa South Road Properties tungod kay daghan ang mag-estambay sa lugar ug basin unya adunay uban nga maghimo og ilegal nga kalihokan diha sa maong dapit.