Luna nga giukopahan sa NIA bawion sa Kapitolyo

CEBU, Philippines —  Ipadayon sa Probinsiya sa Sugboa ang plano niini sa pag-revoke sa deed of donation sa property nga kasamtangang giukopahan sa National Irrigation Administration sa Central Visayas (NIA)-7.

Ang Kapitolyo maoy orihinal nga tag-iya sa maong luna diha sa Gov. M. Cuenco Avenue sa Barangay Banilad, Siyudad sa Sugbo.

Sayo pa, nitanyag ang Kapitolyo ngadto sa maong ahensiya nga i-relocate ang opisina niini ngadto sa Department of Agriculture Compound sa Barangay Guadalupe o sa Sitio Sudlon, Barangay Lahug.

Ang kasamtangang lokasyon sa NIA-7 duol ra sa Cebu IT Park nga karon adunay taas nga commercial value.

Apan sa report sa Capitol Information Office, nibalibad ang NIA nga mobalhin tungod kay nag-operate usab kini og multi-purpose commercial building sa maong  dapit.

Atol sa tigom tali ni Gobernador Gwendolyn Garcia uban sa pangulo sa NIA nga si Eduardo Guillen niadtong Abril 13, 2023 ang gobernador nagkanayon nga ang pag-operate og muli-purpose commercial building usa ka kalapasan sa deed of donation tali sa Kapitolyo ug sa maong ahensiya gumikan kay ang katuyoan ra unta paggamit sa maong luna mao ang official function sa nahisgutang ahensiya.

Matud sa Kapitolyo nga human nadungog ni Guillen ang rason sa gobernador nidesisyon kini nga i-withdraw ang intension sa NIA sa pagpadagan og commercial complex ug nisugot na kini nga makig-alayon sa Kapitolyo kalabot sa relokasyon sa regional office niini.

Nasayran nga si Garcia taud-taod na kining nidesisyon nga kuhaon og balik ang maong prime lots nga kasamtangang giukopahan sa government agencies sama sa TESDA, PopCom, NFA ug uban pa.

Plano usab ni Garcia nga i-develop ang property sa Kapitolyo diha sa Gov. M. Cuenco Avenue aron ma-develop ngadto sa revenue-generating enterprise aron modugang kini og kita sa panudlanan sa Kapitolyo ug magamit ang kita ngadto sa nagkadaiyang programa ug proyekto nga ipatuman sa Probinsiya sa Sugbo. — BDB (BANATNEWS)