Mga biyahe sa barko sa amihanan gisuspenso
CEBU, Philippines — Gisuspenso kagahapon ang mga biyahe sa barko sa amihanang bahin sa Sugbo gumikan sa dili maayong lakat sa panahon nga nasinati sa pipila ka mga lugar.
Ang Philipine Coast Guard Station sa Dakbayan sa Bogo nisuspenso sa biyahe sa barko gikan Polambato padulong sa Villaba, Leyte tungod sa kasarangan hangtud sa kusog nga huros sa hangin ang nasinati gumikan sa bagyong Amang.
Gisuspenso usab ang biyahe sa barko gikan sa pantalan sa Dakbayan sa Danao padulong sa pantalan sa Consuelo sa Lungsod sa San Francisco, Isla sa Camotes gikan alas 8:30 sa buntag hangtud sa alas 10:00 sa gabii kagahapon.
Nunot niini, nangandam gihapon ang Talisay City Disaster Risk Reduction and Management Office (CDRRMO) bisan og wala mapaubos sa storm signal ang Sugbo. Si Mayor Gerald Anthony “Samsam” Gullas, Jr. nakig-estorya na ni Alvin Santillana, pangulo sa CDRRMO kalabot sa epekto unya sa bagyong Amang sa Dakbayan sa Talisay.
Si Santillana nagkanayon nga alerto lang sila daan bisan og dili kaayo magdala og epekto ang bagyo sa Sugbo.
Matud ni Santillana nga gipaandam usab nila ang mga gipangbansay nila sa kabarangayan panagana kong ugaling adunay panghitabo.
Sa iyang bahin, si Police Lieutenant Colonel Randy Caballes, hepe sa kapolisan sa siyudad nibutyag nga lakip sila ang nangandam usab.
Samtang si Gullas nagkanayon nga iyaha na nga gitugyan sa mga kadagkoan sa eskwelahan kong adunay pagkanselar sa klase. - Gabriel C. Bonjoc, BDB (BANATNEWS)
- Latest
