Managsuong bata nga lalaki nangalumos sa septic tank

CEBU, Philippines — Magsuong mga batang lalaki ang nalumos niadtong Domingo sa buntag diha sa gitrabaho nga septic tank sa Sitio Sayaw Laray, Barangay San Roque, Dakbayan sa Talisay.

Ang mga nalumos mao sila si Mark Emman, 6-anyos ug Nathaniel Llamedo, 7- anyos.

Si Police Lieutenant Colonel Randy Caballes, hepe sa kapolisan sa Dakbayan sa Talisay nibutyag nga alas 4:00 sa hapon na nila nadawat ang taho kalabot sa maong insidente.

Ang kabanay sa mga bata nisaysay ngadto sa kapolisan nga nagduwa kini sila uban sa ilang mga ig-agaw diha sa dakong hawan sa dapit.

Gihulagway nga ang nahisgutang lugar lapokon hinungdan nga ang mga bata nagkalapok kini ug nanghugas diha sa gitrabaho pa nga septic tank diin adunay nagpundong tubig.

Base sa imbestigasyon sa kapolisan nasuta nga nagkupot sa kable ang magsuon apan kalit lang sila nga nahagbong.

Ang mga ig-agaw sa duha ka managsuon nakahigayon pa og kupot sa mga kamot sa mga naulahi apan nabuhian tungod sa kadangog gumikan sa lapok hinungdan nga nangalumos kini. Dihang nahaw-as gikan sa septic tank ang magsuon gisuway kini og tabang apan wala na kini ma-revive.

Ang septic tank gibana-bana nga adunay gilawmon nga 10 ka tiil.

Gisusi karon sa kapolisan kong aduna bay tulobagon ang mga ginikanan, ang naghimo sa septic tank nga gibiyaan lang nga walay tabon. (BANATNEWS)