Negosyante nabiktima sa pagpangawat atol sa Huwebes Santo

CEBU, Philippines — Walay gipili ang mga kawatan gumikan kay bisan og Huwebes Santos adunay gikawatan og bag nga adunay mga sulod nga alahas, kwarta ug gadget nga ang tanan nibalor ngadto sa dul-an sa P1 milyon diha sa usa ka imnanan sa 88 Avenue, Governor Cuenco, Barangay Kasambagan, Dakbayan sa Sugbo.

Matud ni Police Major Eraño Regidor, hepe sa Mabolo Police Station nga ang mga suspetsado nga sila si Richie Rodriguez, 26-anyos ug Erwin Rodriguez, 32, pulos molupyo sa Barangay Lahug, niining siyudad nikuha sa branded nga bag sa usa ka negosyante.

Matud ni Regidor nga ang biktima nikanaog kadali sa sakyanan tungod kay adunay gitan-aw sa likod tungod kay adunay nanuktok ug dihang nakanaog na ang biktima giingong gikuha dayon sa mga kawatan ang bag niini.

Apan nadakpan ang usa sa mga kawatan nga si Richie ug na-recover usab ang mga gikawat human nagpahigayon og follow-up operation ang kapolisan sa Mabolo Police Station tungod kay gawas nga naay nakakita nakuha usab sa close circuit television (CCTV) camera ang insidente.

Matud ni Regidor ang modus aning Richie giingong mamantay sa mga imnanan ilabi na niining mga nakainom dayon mohimo og krimen. Giingong si Richie aduna na usab kini kaso kaniadto nga kawat gihapon.

Gawas sa maong insidente wala nay laing dagkong panghitabo nga natala ang Cebu City Police Office atol sa Semana Santa.

Samtang ni Police Colonel Ireneo Dalogdog, direktor sa Cebu City Police Office nagkanayon nga adunay nawad-an og cellphone sulod sa simbahan apan nakuha ra usab kini sa tag-iya tungod kay na turnover man ang unit sa police.

Subay niini, gihulagway sa Cebu Police Provincial Office nga generally peaceful ang pagtimaan sa Semana Santa.  Sama sa CPPO gihulagway usab sa Mandaue City Police Office nga generally peacefull ang Dakbayan sa Mandaue atol sa Semana Santa. —Rowena D. Capistrano (BANATNEWS)