Leo Lastimosa gi-abswelto sa sc sa kasong libel

Gi abswelto sa Korte Suprema ang Sugboanong columnist nga si Leo Lastimosa sa kasong libel nga gisang-at ni Cebu Governor Gwendolyn Garcia.

Ang walo ka pahina nga desisyon nakab-ot niadtong Disyembre 5 sa miaging tuig apan niadto pang Abril 3, 2023 na download sa Supreme Court website.

Kahinumduman ang maong complaint ni Garcia naggumikan sa column ni Lastimosa nga mao ang “Arangkada” nga na published sa The Freeman, pinitsahan og June 29, 2007 nga giulohan og “Si Doling Kawatan” or “Doling a Thief”.

Sa maong column si Lastimosa, kinsa usa usab ka broadcast journalist mihulagway kang Doling isip usa ka barangay captain, fish-monger, loudmouth, abrasive, cruel, ug arrogant.

Atol sa arraignment sa Lower Court, si Lastimosa, mi plead not guilty sa kaso nga gisang-at batok kaniya.

Suma pa sa prosekusyon si Lastimosa kanunay nga mosaway kang Garcia ug giinsister usab sa prosekusyon nga si Garcia ang gipasabot ni Lastimosa sa iyang column aron pagdaut sa reputasyon sa gobernador.

Ang Regional Trial Court Branch 14 sa Cebu City mikonbikto kang Lastimosa niadtong August 30, 2013.

Si Lastimosa miapilar sa iyang conviction sa Court of Appeals nga mi affirmed usab sa naunang conviction sa korte hinungdan nga miduso sa kaso ngadto sa Supreme Court pinaagi sa petition for certiorari.

Sa desisyon sa Korte Suprema gipadayag niini nga dili mahimong basihan ang mga nasuwat ni Lastimosa batok kang Garcia nga maoy rason nga pagasabton nga si Garcia ang gipasabot sa iyang column nga “Doling Kawatan”.

“In other words, that Doling refers to Garcia is not a logical conclusion of the fact that Lastimosa had previously written about Garcia,” tipik sa SC decision nga gipirmahan ni Associate Justice Alfredo Benjamin Caguioa, ug ni Associate Justices Henri Jean Paul Inting (chairperson), Samuel Gaerlan, ug Maria Filomena Singh. Gikan sa The Freeman

10,000 ka Oponganon mosuporta sa BIDA program

Gipaniguro ni Lapu-Lapu City Mayor Junard “Ahong” Chan ngadto sa mga opisyal sa Department of Interior and Local Government DILG nga mopakita sa ilang suporta ang 10,000 ka mga Oponganon pinaagi sa pagtambong sa kalihokan nga pagahimoon nga mao ang Buhay Ingatan Droga’y Ayawan kun (BIDA).

Kini gikatakdang pagahimoon karong Abril 22, 2023 nga adto ipahigayon sa Hoopsdome sa Barangay Gun-ob sa maong siyudad.

Gipadayag ni Mayor Chan atol sa gihimong coordination meeting niadtong miaging semana nga iya nang gitahasan ang buhatan sa City of Lapu-Lapu Office for Substance Abuse Prevention (CLOSAP) nga maoy local person sa kagamhanan sa dakbayan.

Si Gary Lao nga maoy executive director sa CLOSAP miingon nga nagtinabangay ang kabarangayan alang sa kalampusan sa maong kalihokan nga tambongan usab ni DILG Secretary Benhur Abalos.

Samtang gidasig ni DILG Lapu-Lapu City Director Jonah Pino ang kabarangayan sa dakbayan sa paghatag og kusganong suporta sa umaabot nga kalihokan ilabi na sa fun run ug walk for a cause nga pagahimoon.

Sa nasayran ang BIDA program usa kini ka nationwide advocacy program sa administrasyon ni Presidente Ferdinand Marcos nga ang katuyoan mao ang pag-abli ug pagdasig sa kumunidad nga malikayan ang illegal nga drugas .— MEL (BANAT NEWS)