Skywalk sa MC Briones gidemolis kay peligro

CEBU, Philippines — Hingpit na nga nahibalik ang normal nga dagan sa trapiko sa dalan M.C. Briones sa eskina Sudlon Maguikay human nga gipa-demolish ang naguba nga skywalk nga nabanggaan og  refrigerated van pipila ka adlaw na ang nakalabay.

Natigayon ang paspas nga demolisyon sa nahisgotang skywalk tungod sa awhag ni Mayor Jonas Cortes ngadto sa buhatan sa Department of Public Works  and Highways (DPWH) nga maoy adunay kaakohan niini.

Ang maong dalan wala una paagi og mga sakyanan tungod sa peligrong dala sa pagkaguba sa maong skywalk tungod kay posible kining mahugno ug makaigo og mga sakyanan o mga tawo nga molabang sa ilawom niini.

Sa pikas bahin, padayon pa ang mga otoridad sa siyudad sa pagpangita ug pagila kun kinsa ang drayber sa refrigerated van nga giingong maoy nakabangga sa maong estraktura nga maoy nakaingon sa pagkaguba niini. —/IBM (BANAT NEWS)