Drayber nga naisyuhan og citation dili na maka-renew sa lisensiya

CEBU, Philippines — Dili na unya maka-renew sa ilang mga lisensiya ang mga drayber nga naisyuhan og citation ticket.

Kini base sa Memorandum Circular 2023-2383 nga naaprobahan ni Atty. Jose Arturo Tugade sa Land Transportation Office niadtong Marso 6, niining tuiga.

Gumikan niini, gipahigayon ang tigom ni Atty. Noreen Bernadeth San Luis-Lutey sa Interconnectivity Management System sa LTO uban sa mga pangulo sa traffic office sa Siyudad sa Sugbo ingon man mga silingan nga siyudad.

Matud ni Lutey nga sa ingon niini nga kamandoan mamenosan na ang mga badlongon sa karsada.

Samtang si Jonathan Tumulak, pangulo sa City of Talisay-Traffic Operation Development Authority (CT-TODA) nipasabot nga kadtong mga drayber nga naisyuhan og citation ticket nga wala nila atimana maoy maapektohan niini nga kamandoan ilabi na nga nahatag na nila ang detalye ngadto sa system sa LTO.

Matud ni Tumulak nga tun-an na nila sugod karon ang maong memorandum circular aron makasumiter og rekomendasyon sa dili pa mahitabo ang pagpirma sa memorandum of agreement (MOA) tali sa lokal nga kagamhanan sa Dakbayan sa Talisay ug sa LTO.

Gibutyag ni Tumulak nga posible karong tuiga ma-implementar ang maong kamandoan.

Sa naandan ang buhatan sa CT-TODA mopasaka og kaso sa mga naisyuhan og citation ticket ngadto sa korte apan sa bag-ong kalamboan deretso na kini sa buhatan sa LTO og sila na ang mopahamtang og tukmang silot sa mga badlongon nga drayber. — BDB (FREEMAN)