Barangay Maghaway tinguha nga ipatuman ang truck ban sa ilang lugar

CEBU, Philippines — Mihangyo og truck ban ang konseho sa barangay Maghaway, Dakbayan sa Talisay ngadto sa konseho sa siyudad.

Kini alang sa seguridad sa ilang mga konstituwenti ilabi na sa mga tinun-an nga manglakaw panahon sa tingklase.

Si bise mayor Richard Francis “Choy” Aznar nibutyag nga nidangat nila ang resolusyon sa konseho sa barangay hinungdan nga ilang gihimo ang unang committee hearing.

Matud pa ni Aznar nga nakasabot kaayo sila sa hangyo sa barangay apan ang unang panagtigom ila unang gipadaplin aron ipatawag ang komitiba sa solid waste ug sa traffic kay usa man dinhi ang ilang gipasabot, ang truck nga magdala og basura sa siyudad.

Ang truck ban nga ilang gihangyo mao ang oras sa alas 6 sa buntag hangtud sa alas 8 sa buntag mobalik kini sa alas 3 sa hapon ngadto sa alas 5 sa hapon diin ang mga oras mao ang pagsulod ug pag gawas sa kabataan gikan sa ilang tunghaan.

Ang landfill sa Talisay nahimutang sa barangay Tapul busa ang mga truck moagi sa barangay Linao ug Maghaway ug ang pikas agianan diha sa Camella Homes sa barangay Lawaan 1.Usa sab sa rason sa paghingusog sa mga opisyales sa barangay mao ang pagkadisgrasya sa tinun-an human nahaybol ang truck gumikan sa katangason. — MEL (FREEMAN)