Siyete mil ka siyudad misalmot sa Earth Hour kagabii

CEBU, Philippines —  Giawhag ni Presidente Ferdinand Marcos Jr. ang tanang Pilipino nga pagngon ang ilang kuryente alas 8:30 p.m. hangtud 9:30 p.m. kagabii (Sabado) isip tampo sa Pilipinas pagpamenus sa carbon footprint ug batokan ang makadaut nga epekto sa climate change sa kinaiyahan subay sa pagtimaan sa Earth Hour.

Ang Earth Hour usa ka world-wide event nga gipangunahan sa  World Wildlife sukad pa niadtong tuig 2007 aron dasigon ang tanan maghimo og aksyon bahin sa global warming sa tinguha nga mabali ang padayong pagkaguba sa kinaiyahan.

Ang Earth Hour mao ang gikonsiderar nga kinadakoan nga kampanya sa kalibotan alang sa pagpabalik sa kahimsog sa kalibotan.

“It only takes 60 minutes to do good for our future. 60 minutes to take notice and commit to saving mother nature to be united and take action,” pagdasig pa sa presidente pinaagi sa iyang video statement nga gipagawas kagahapong adlawa.

“Because together, nothing is impossible. Let’s switch off and give mother nature 60 minutes to breathe,” matud pa niya.

Ang Earth Hour karong tuiga dinhi sa Pilipinas pangunahan sa Quezon City government sa Quezon City Memorial Circle kagabii.

Gipaabot nga siyete mil ka mga siyudad sa 193 ka mga nasud ang misalmot sa kalihokan kagabii.

“Every year, the Philippines is hit with an average of 20 typhoons making it one of the most vulnerable countries to climate change,” matud pa ni Marcos.

“As the earth’s temperature gets warmer, with the world’s carbon footprint reaches a new all-time high of 36.8 gigaton in 2022, the world braces for the irreversible impact of climate change,” dugang pa niya.

Niadtong adlaw nga Biyernes ang Department of Environment and Natural Resources nanawagan sa mga Pilipino sa pagsalmot sa Earth Hour apil na ang tanang mga ahensiya sa gobiyerno sa pagpawong sa ilang mga suga.

Sumala pa sa WWF ang 60 minutos nga pagpawong sa suga bisan kausa lang sa usa ka tuig sa pagkatinuod makatabang na sa proteksyon sa kinaiyahan ug pagpakita kini sa katawhan sa intension nga protektahan ang kalibotan sa umaabot pang mga panahon.

Matud pa niya, kining dungan ug panaghiusa sa mga tawo pagsanong sa panawagan usa ka maayong tilimad-on ug determinasyon sa damgo sa maong kalihokan.(BANAT NEWS)