Video sa 15-anyos gitabangag kulata nag-viral

CEBU, Philippines — Pamilya sa menor de edad nga nag-viral sa social samtang kini gitabangan og kulata sa grupo sa mga kababayen-an nga giingong nahitabo sa  Sitio Tangke, Barangay Ticad, Bantayan Island niadtong nakalabay nga adlaw nga Sabado, mosang-at og mga kaso batok niadtong nipasipala sa bata.

Ang uyoan sa biktima nga si Al Pacinio mibutyag nga ang maong menor de edad residente sa Lungsod sa Santa Fe.

Samtang usa uyoan sa maong 15-anyos nga dalagitang dunay kakulian sa pangisip miingon nga maglakaw lakaw gayud kini magabii tungod kay mag internet.

Unya duna sab kini mga barkada nga iyang ka chat-chat ug usahay maabot sa laing lungsod unya usahay dili na makit-an sa iyang mga apohan kung asa napunta kay dugay kini mauli.

Sumala pa ni Pacinio, niadtong niaging Sabado nagkasabot ang pagumangkon sa mga barkada nga mangadto sa Bantayan kay naghinangat ang pista.

Apan matud pang Pacinio wala magdahom ang iyang pagumangkon nga gibaligya kini aron ipakulata ngadto sa pipila ka mga batan-on.

Gitug-an ni Pacinio, ang iyang pag-umangkon niuli sa ilaha sa Santa Fe, adlaw nga Domingo ug nagtuo iyang mga ginikanan ug mga apohan sa bata nga nakakita lang kini ug sukmagay.

Kini tungod kay aduna kini mga bun-og sa kalawasan ug sa nawong. Apan dako nilang kahikurat niadtong adlaw nga Martes sa dihang dunay post nga video sa social media nga nagpakitang gitabangan kini og kulata.

Matud pa nga dili mominos sa duha ka babaye ang nagpuli-puli og dagmal sa biktima kinsa gibitad-bitad ang buhok ug gipatid-patiran ug gisukmag bisan asang bahin sa lawas samtang nagtan-aw lang ang ubang mga batan-on.

Dunay usa ka babaye nga mibadlong ug mibabag sa mga batan-ong gustong pahunongon ang pagdagmal sa biktima.

Nasayran sab sa pamilya sa biktima nga ang mga kauban niini nakadagan atol sa maong insidente ug didto usa nangatulog sa kamalig nga walay tawo sa usa sa mga lugar sa Bantayan.

Apan pipila ka adlaw human sa maong hitabo nagsige og mulo sa kasakit sa iyang ulo ug naglipong-lipong ang biktima, nagsuka-suka sab kini ug gihilantan nga gituohan nilang epekto kini sa pagkulata sa maong mga babaye. Tungod sa pagsige niini og mulo, gidala nila sa Dakbayan sa Sugbo niadtong adlaw nga Sabado ang biktima , usa ka semana gikan siya gikulata aron magpa CT-Scan.

Matud pa nabantayan sab nila nga nahimo ng hadlokanon ug pirmeng matulala ang bata sukad sa nahitabo kaniya. Ang biktima giabagan karon sa ilang SK Chairman sa lungsod sa Santa Fe nga si  Kle-Kle Lao.

Gipahibalo ni Pacinio nga ipasaka nila ang kaso ugmang adlawa (Lunes) tungod kay dili makatawhanon ang gihimo ngadto  sa ilang pag-umangkon.

Buot sa pamilya nga papanubagon sa balaod kadtong mipasipala sa ilang pag-umangkon ug aron sab maleksyon ang kabatan-onan nga dili mahimong himuong duwaan ang ilang isi’g ka tawo.

Ang kapulisan sa Bantayan Island nitug-an nga sa pagkakaron padayon pa ang ilang gihimo nga imbestigasyon may kalabutan sa maong insidente.

Sumala pa ni Patrolman Florante Desucatan, Duty Investigator nitug-an nga nagpaabot nalang sila sa pamilya ug sa DSWD sa pagpasaka sa kaso.

Nagtuo si Desucatan nga mga miyembro og gang ang mga babayeng nikulata sa batan-on. (BANAT NEWS)