Mga river troopers, street cleaners sa Cebu City hatagan og pasidungog
CEBU, Philippines — Gihatagan og bili ni Cebu City Mayor Michael Rama ang trabaho sa mga mamumuo, river troopers, ug street cleaners ug plano niya nga mohatag og espesyal nga pasidungog niini.
Ang mga mamumuo, mga tiglimpiyo ug uban pa mahimong tawgon nga ordinaryo nga mga empleyado apan naghimo og mga extra-ordinary nga trabaho alang sa siyudad. Matud ni Rama atol sa flag ceremony kagahapon nga iyaha na nga gitahasan ang city administrator Suzanne Ardosa kabahin sa mao niyang tumong.
Gusto ni Rama nga ang awarding ipahigayon sa buwan Mayo niining tuiga simbolo usab sa labor day sa Mayo 1 diin ang pagpili niini mahimong bottoms up.
Sa laing bahin, nanawagan si Rama sa kaubanan niya nga elected officials nga motambong kanunay sa mga flag ceremony.
Ang flag raising ceremony usa ka paagi sa pagpasidungog sa bandera, pagtahud sa nasud sa usa ka tawo ug pagpasalamat sa kagawasan nga natagamtaman.
Human sa flag raising ceremony kagahapon iyang gi-acknowledge sila si konsehal Francis Esparis, Jaypee Labella, Joel Garganera nga kanunay’ng motambong sa flag raising.
Subling gipasabot ni Rama nga usa lang kini sa pagtimaan sa husto. Gipahinumduman usab ni Rama ang mga empleyado sa kabililhon sa pagtambong sa flag-raising events.
Dugang ni Rama nga pinaagi sa pagtan-aw sa mga hulagway sa ilang mga apohan o mga ginikanan nga nitambong sa flag ceremonies makamugna na kini og garbo. – BDB (BANATNEWS)
- Latest
