12 ka balay gidemolis sa siyudad sa Mandaue

CEBU, Philippines —  Mokabat sa 12 ka mga balay ang gidemolis sa mga sakop sa Housing Urban and Development Office (HUDO) sa Siyudad sa Mandaue.

Ang maong mga panimay nahimutang diha sa LTHAI Village sa Barangay Tipolo sa nahisgutang siyudad.

Suma pa ni Cesar Ylanan, pangulo sa demolition team sa HUDO nga ang maong mga balay nakalapas sa three- meter easement zone sa creek hinungdan nga kini gi demolish.

Gihatagan na og notice to vacate ang mga tag-iya sa mga panimay ug aduna nay uban nga boluntaryong miguba sa ilang mga pinuy-anan daplin sa creek.

Apan suma pa ni Ylanan nga ang nahibiling 12 ka panimay nagpabilin nga wa giguba hinungdan nga napugos sila sa pagpatuman sa demolition. Si Fatima Lapiña, community affair officer 1 sa HUDO beneficiary selection committee miingon nga ang ilang buhatan naghimo gayod og tukmang lakang sa wala pa himo-a ang pagdemolis.

Naglakip niini ang gipahigayon nila nga consultative meeting sa makadaghang higayon uban sa mga naapektohan nga pamilya ingon man ang pagpadala og mga notice to vacate sa lugar. — MEL (BANATNEWS)