Ordinansahon nga maghatag og tabang sa mga tinun-an giduso

CEBU, Philippines — Adunay gisugyot nga ordinansahon si Konsehal Mary Ann delos Santos nga nagtingoha sa pag-establisar og student assistance program alang sa tanang pampublikong tunghaan sa Dakbayan sa Sugbo nga nagtanyag og elementary, junior ug senior highschool education ingon man usab ang pagahin og pundo niini.

Sa nasayran ubos sa local government code of 1991 (R.A. No. 7160) ang matag local government unit kinahanglang mogamit sa gahom nga maghatag og epektibo nga pagduma og pagpasiugda sa kinatibuk-ang kaayohan.

Mag-umol kini sa Dakbayan sa Sugbo sa pagsuporta sa lakang sa pagpatuman sa katungod sa matag bata ug kabatan-onan ngadto sa mental health, ingon man sa pagpalambo sa ilang kaayohan pinaagi sa pagsiguro sa patas nga pag-access sa psychosocial nga suporta.

Base sa section 5 sa maong ordinansahon, adunay pagahimoon nga Student Assistance Program (SAP) Team.

Ang team langkoban sa kasamtangang school guidance counselor ug usa ka gitahasan nga magtutudlo kada grade level.

Ipaubos kini og lapad nga training sa programa uban sa mga representante gikan sa Behavioral Health Unit (BBHU), City Health Department, ug Department of Social Welfare and Services.

Tahasan ang DSWS sa pag-isyu sa gikinahanglang guidelines sa pagpatuman niini, ingon man sa pakig-alayon sa City Health Department, Department of Education ug guidance counselors gikan sa lain-laing mga eskwelahan sa paghimo sa gikinahanglang porma, questionnaires, ug uban pang importanteng dokumento aron ma mamintinar ang pagpatuman niini.

Maghatag usab ang SAP Team og edukasyon sa pamilya aron masabtan niini ang mga butang kalabot sa mental health.

Mohimo usab kini og interbensyon aron masulbad ang problema ug tukion ang mga posibilidad kung unsaon pagsuporta sa pamilya ang problemadong estudyante.

Ang mga tinun-an nga ma-identify nga naghambin og mental health problems itugyan kini sa Barangay Behavioral Health Unit (BBHU) alang sa dugang pag-atiman.

Nalakip usab sa ordinansahon nga himoon sa SAP Team uban sa pakigtambayayong sa BBHU alang sa follow-up ug pagmonitor sa pag-uswag sa estudyante.

Mopasiugda usab ang maong grupo og mga mental awareness seminar.

"The amount necessary to carry out the provisions of this Ordinance shall be included in the Annual Budget of the year following its enactment into law and thereafter," dugang unod sa maong ordinansahon.

Ang maong ordinansahon gitun-an na karon sa committee on laws, ordinances, and styling sa konseho. (BANATNEWS)