Gob. Degamo, laing siyam gipamusil patay

CEBU, Philippines — Patay ang gobernador sa Negros Oriental, Gob. Roel Degamo uban sa siyam ka mga tawo ug miangol usab og daghan pa sa dihang kalit nga silang gipamusil sa mga armadong kalalakin-an nga nagsuot og uniporme sa military diha sa entrada sa balay niini sa Barangay San Isidro, Sto. Nueba sa Lungsod sa Pamplona kagahapon sa buntag.

Mismo ang asawa sa gobernador nga si Pamplona Mayor Janice Degamo ang mikompirmar niini pinaagi sa Facebook kagahapong adlawa diin siya nanawagan sa nasudnong kagamhanan pagpangita sa mga mamumuno.

Ang mga mamumuno nga gibanabanang dilo momenus napulo ka tawo matud pa sa kapolisan nagsuot og “fixelized camouflage” ug pulos tanan armado og tag-as nga armas.

Si Gov. Degamo anang tungora nagatiman sa mga nangayo og hinabang ang uban benepisaryo sa 4Ps sa gobiyerno diha sa entrada sa panimalay niini.

Matud pa miabot ang unom ka mga wala mailhing mga lalaking nakauniporme ug armadog tag-as nga kalibre sa armas.

Kalit nga gipamusil sa maong mga lalaki si Degamo sa makadaghang higayon, apil sab sa girakrakan ang mga sibilyan nga nagpaabot sa ayuda.

Si Degamo gidala sa Negros Oriental Polymedic Hospital sa Sibulan samtang ang uban gidala sa nagkalain-laing tambalanan sa Dumaguete City.

Apan nakabsan gyud sa kinabuhi si Degamo ug laing siyam samtang daghan sab ang nangaangol nga gidala sa tambalanan.

Hot pursuit

Sa report sa Police Regional Office-7 ang Regional Special Investigation Task Group ang nakakatutok sa imbestigasyon.

Sa hot pursuit operation nga gilusad sa kapulisan sa Negros Oriental Police Office (NOPPO) nadiskubrehan ang tulo ka gibiyaang mga sakyanan nga gituohang maoy getaway vehicles sa mga mamumuno sa Brgy. Kansumalig, Bayawan City, Negros Oriental

Kini naglakip sa Mitsubishi Pajero nga dunay plate number NQZ 735, Izuzu pickup color green ug dunay plate number nga GRY 162 ug itom nga Mitsubishi Montero nga dunay plate number YAP 163.

Matud pa dili momenus napulo ka mga tawo ang nakit-ang nanggawas gikan sa maong mga sakyanan nga padayon pa karong gipangita.

Ex-military

Kagahapon sa hapon, dunay tulo ka mga lalaki ang gidakop sa kapolisan nga nakuhaan og mga armas diha sa Sitio Punong sa Barangay Cansumalig sa Bayawan City.

Ang duha niini mga kanhi sakop sa Philippine Army samtang sibilyan ang usa. Ang mga suspek giila nga sila si Joric Labrador, 50, kanhi sundalo ug residente sa Cagayan De Oro City; Joven Aber, 42, kanhi Army Ranger ug residente sa Barangay Robles, La Castellana, Negros Oriental; ug ang sibilyan nga si Benjie Rodriguez, 45, taga Bonifacio, Misamis Occidental.

Nakuha gikan sa tulo ang usa ka kalibre .45 nga armas, usa ka magazine nga puno og bala ug tulo ka identification cards.

Ang tulo nadakpan sa hiniusang hot pursuit operation sa Police Regional Office-7, PNP Special Action Force ug Philippine Army.

Ang kapolisan sa Negros Oriental padayon karong nagpahigayon og hot pursuit operation batok sa mga mamumuno ug nag-imbestigar sa motibo sa maong pagpatay nga nakapagan og mga inosenteng sibilyan.

Mga nakalas

Base sa nahipos nga impormasyon sa Banat News gikan sa kapolisan, ang mga nakalas nga gidala sa nagkadaiyang tambalanan mao sila si Jessie Bot-aym 48, taga Sta. Catalina; Kagawad Jose Marie Ramirez, 41, ; Jerome Maquiling, 48, kawani sa provincial engineering office nga usa sa driver sa convoy ni Degamo;  Jomar Canseco, 33, driver sa provincial health office; Crispin Vallega, 40, driver/ security ni Degamo; Florenda Lovitaña Quinikito; Joseph Netada, ug Michael Gidan Fabugais.

Lakip sa 14 ka mga naangol ang usa ka doktor, duha ka security escort ni Degamo ug mga sibilyan. — /IBM (BANAT NEWS)