Fetus nga babaye napalgan sa tangke sa septic truck

CEBU, Philippines —  Usa ka fetus nga babaye nga gibana-banang nagpangedaron og 24 ka semana o unom ka buwan ang napalgan diha sulod sa usa ka septic truck dihang dalhon na unta sa Dakbayan sa Sugbo alang sa proper disposal ang nasuyop nga hugaw niadtong Biyernes sa buntag.

Ang drayber sa P and J Septic Tank nga si Rowel Moreno, hingkod ang panuigon nanglimpiyo kini sa usa sa mga portalet diha sulod sa compound sa Cebu International Convention Center (CICC) sa Barangay Guizo, Dakbayan sa Mandaue sa nahisgutang adlaw diin nadiskubrehan ang maong fetus.

Ang kapolisan sa Police Station 1 nakadawat og taho gikan sa City Tactical Operations Center (CTOC) sa Mandaue City Police Office kalabot sa maong insidente.

Base sa imbestigasyon sa kapolisan nabantayan ni Moreno ang fetus nga naglutaw diha sa sulod sa steel container hinungdan nga nangayo sila og tabang sa City Disaster Risk Reduction and Management Office sa Dakbayan sa Mandaue.

Ang duty nurse sa CDRRMO nikompirmar nga patay na ang maong fetus.

Matud ni Patrolman Jemson Tolin Centro Police Station nga padayon ang ilaha karong imbestigasyon sa maong hitabo aron mailhan ang inahan sa maong puya. — BDB (BANATNEWS)