Nilapwa sa iro ug iring gikasohan na sa piskalya
CEBU, Philippines — Gipasaka gihapon sa kapulisan sa Mambaling Police Station 11 sa Cebu City Police ang kasong kalapasan sa Republic Act 8485 kun Animal Welfare Act batok sa lalaking milapwa og ininit nga tubig sa iro ug iring diha sa Barangay Mambaling.
Kini bisan pa og ang tagiya sa iro nga si Gina Lucido nipadayag nga dili na kini interesadong mopadayon sa pagpasaka og kas batok kang Jason Fuentes.
Ang kaso giduso na diha sa City Prosecutor’s Office kagahapong adlawa ug matud pang Police Lt. Col. Janette Rafter, Deputy City Director for Operations nga adto nalang maghusay ang reklamante ug ang suspek kun moatras kini sa kaso. “Ang amo diha mahunong nami sa amoang obligasyon. As long as naduso na namo sa korte, so kung naa sila’y regardless unsay ilahang kasabutan ilaha nana. Dili manginlabot ang atong kapulisan, didto na sila mag-abot sa fiscal kung unsa man gani ang ilahang nasabutan,” matud ni Rafter.
Kagahapon sa buntag nag-estorya sila si Lucido ug Fuentes diha sa Police Station diin si Lucido miingon nga kun nangayo lang gyud dayon og pasaylo ang dinakpan dili na unta sila maabot sa mao nga sitwasyon.
Matud ni Lucido nga gusto niya maleksyon ang dinakpan sa iyang gibuhat aron dili na kini mopasipala dili lang sa iyahang iro apan apil na sa uban.
Gidawat hinuon ni Lucido ang pagpangayo og pasaylo ni Fuentes kagahapon, apan kini mitataw nga duna sila’y pirmahan nga kasabotan nga dili na kini mousab.
Ang suspek miingon nga nagbasol siya sa iyang nabuhat, giangkon niyang iyang gisabliga’g init tubig ang iro, apan gihimakak niya nga siya sab ang nilapwa s airing.
“Tagaan nako siya og second chance kay first offense pa man siya, nahulog eye opener sa katawhan nga dili gyud diay angay dagmalan ang hayop bisan mubo silang tanan og makasala man gani naa may barangay, naay police station pwede adto sila modangop,” matud ni Lucido.
Ang matag police stations adunay Animal Welfare Desk diin naa sila’y mga tawo nga gipangbansay nga magsilbing focal person sa pagpatuman sa Animal Welfare Act. (BANATNEWS)
- Latest
