Cebu City speed limit sa kinahanglang tumanon

CEBU, Philippines —  Human natala ang  panagbangga sa niaging adlaw diha sa may S. Osmeña Avenue sa North Reclamation Area nga niresulta sa pagkalimbuwad sa usa ka taxi,  gipahinumdoman sa Cebu City Transportation Office ang mga motorista kalabot sa  speed limit nga gimando sa City Ordinance 2612.

Suma pa gipagawas nga statement sa  CCTO  , ang City Ordinance 2612 naglatid  sa limitasyon sa gikusgon sa pagpadagan sa tanang matang sa sakyanan sa motadlas sa mga karsada  ubos sa hurisdiksyon sa dakbayan.

Ang tanang sakyanan kinahanglang dili molapas sa gikusgon nga 60 kph (kilometer per hour) sa mga dagko nga dalan (national primary o secondary roads) o mga “Open Roads” sama sa Cebu South Coastal Road diha sa SRP, ug 20 kph sa mga Barangay Roads (crowded streets).

Gipasidan-an sa CCTO ang mga motorista nga ang overspeeding aduna’y multa nga P2 mil  sa unang offense , P 2,500 sa second offense ug P 3,000 sa third offense ug apil na ang pag-impound sa sakyanan.

Ipaubos usab og upat ka oras nga seminar ang tanang drayber nga makalapas sa maong ordinansa.

Una na nga gibutyag sa CCTO nga ang pagtuman sa mga lagda sa trapiko maoy yawi alang sa hapsay ug malinawon nga kadalanan ug malikay ang katawhan sa bisan unsa nga aksidente.

Usa pud sa gihingusgan karon sa maong departamento mao ang pagukod sa mga magpataka og parada sa ilang sakyanan.

Nihangyo ang CCTO nga dili magpataka og park aron dili mabalda ang kadalanan ilabi na kun dunay moagi nga emergency vehicles.—  IBM (BANATNEWS)