CCWFAC nilusad og feeding program sa kabarangayan sa Cebu City
CEBU, Philippines — Gilusad na ang pagpakaon sa mga bata o feeding program diha sa 80 ka barangay sa Dakbayan sa Sugbo diin ang maong programa gipasiugdahan sa Cebu City Women and Family Affairs Commission (CCWFAC) isip kabahin sa selebrasyon sa nagsingabot 86th charter day sa siyudad.
Sa unang hugna niini, niabot ngadto sa 40 ka barangay ang nakapahimulos sa maong programa.
Matud ni Jojo Lingaolingao, executive director sa CCWFAC nga ang tanang 80 ka barangay sa siyudad ang makapahimulos sa maong feeding program.
Kagahaon sa hapon ang mga bata gikan sa mga barangay sa Hipodromo, Kaputhaw, Kasambagan, Luz, ug Mabolo ang gitapok sa covered court alang sa feeding.
Gibana-bana nga makompleto ang pagpahigayon sa maong programa karong Pebrero 21, 2023.
Base sa taho sa Cebu City Public Information Office, giuna og bisita sa CCWFAC ang bukirang mga barangay sa siyudad.
Ang GAD focal person ug VAWC officers sa kada barangay nipili sa mga bata nga paapilon sa feeding program.
Nagkanayon si Lingaolingao nga naandan na ni Mayor Michael Rama ang pagpasiugda og feeding program sa matag selebrasyon sa charter day. — BDB (BANATNEWS)
- Latest
