Gang war sa Bogo nakaalarma

CEBU, Philippines —  Kagubot sa mga kabataan nga miangol og usa ka dalagita sa Siyudad sa Bogo resulta sa matud pa panagribal sa duha ka mga gangs sumala pa sa hepe sa kapolisan sa maong siyudad.

Si Bogo City Police Station police chief Lt. Col. Joan Arnoco nga nagbinawsanay ang duha ka mga gangs diha sa Purok Rosal 5, sa Barangay Gairan, sa maong dakbayan  niadtong Pebrero 15, 2023.

Ang kagubot niresulta sa pagkaangol usa ka 14-anyos nga babaye. Gikataho nga napagan lang sa gang war ang biktima, apan gikatahong miyembro kini sa usa sa maong nagribal nga gangs.

 Ang biktima nakaangkon og samad pinusilan sa tuo nga batiis ug nasamad sab ang ulo niini kay naigo sa gilabay'ng botelya.

Sa imbestigasyon sa kapulisan, ang biktima kauban ang mga gang members sa ilang grupo nagbahis-bahis sa Sitio Mahayahay sa Barangay Gairan pasado alas 12 sa kaadlawon.

Taud-taod kalit nga dunay miabot nga tulo ka motorsiklo ug mihunong sa ilang tungod. Way daghang estorya, gikatahong kalit silang gipamusil sa mga nagmotor, ug duna say mibato kanila og botelya.

Atol sa hitabo, naigo ang biktima sa botelya diha sa iyang ulo nga nakasamad niini, naigo sab kini sa bala diha sa iyang tiil.

Sa follow-up operation, nadakpan sila si Arthur Guevarra Jr., 26, giingong lider sa karibal nga gang, samtang na rescue sab ang usa ka 17-anyos nga lalake nga iyang kauban, samtang gipangita karon ang lain pa nilang kauban nga naila lang sa pangalan nga “Dode” nga matod pa menor de edad usab.

Si Arnoco miingon nga ang lider nga si Guevarra gikatahong nadunggaban niadtong buwan sa Enero sa lider sab sa karibal nga gang, ug ang pagpamusil maoy ilang bawos.

Gipatawag na sa kapolisan ang mga lider sa maong mga grupo , samtang gipatawag sab ang mga ginikanan sa mga menor de edad nga miyembro aron husayon ug dili na masubli ang kagubot.

Samtang nag-schedule sab sila og meeting sa mga lehitimong mga fraternities aron sila pahibaw-on bahin aning mga gagmay’ng grupo nga nagmugna og kagubot sa siyudad ug aron magmatngon sila aron dili mapagan.

Tungod niini, istrikto gyud nilang ipatuman ang curfew ug ubang ordinansa aron dili mo-grabe ang sitwasyon. — IBM (BANATNEWS)