Kapin sa 4,000 ka indibidwal ang kwalipikado sa raffle sa Kapitolyo

CEBU, Philippines — Kapin sa 4,000 ka indibidwal ang kwalipikado nga makadaog sa ipa-raffle nga bag-ong sakyanan sa Probinsiya sa Sugbo.

Subay kini sa online voting nga gihimo atol sa Sinulog sa Carmen niadtong Enero 22, 2023 diin ang mga online voter mobotar sa ilang mga gusto nga makadaog nga contingent.

Ug kon ang duha ka contingents nga napili sa botante gikan sa free interpretation ug Sinulog based category maoy nakadaog ang voter kwalipikado kini sa raffle diin ang premyo sakyanan ug adunay consolation prize nga giandam sa Kapitolyo.

Atol sa Sinulog sa Carmen ang Siyudad sa Carcar maoy nakadaog sa Sinulog based category samtang ang Toledo City ang nakadaog sa ritual showdown sa free interpretation.

Nipahibalo ang Kapitolyo nga karong Pebrero 14, 2023 o Valentine’s Day ipahigayon ang raffle draw diin ang makadaog tawagan sa Kapitolyo.

Ang maong raffle draw i-live stream kini sa news portal sa probinsiya.

Base sa listahan nga gipagawas sa Capitol Information Office nikabat ngadto sa 4, 471 ang qualifiers sa raffle draw.

“Hinumdumi sa maong adlaw andama ang inyong cellphone ug pag-estar sa lugar nga adunay kusog nga signal ug internet connection kay ang mabunotan nga pangalan, tawagan via video call (Facetime, Viber o Messenger)” abiso sa Kapitolyo sa mga naapil sa listahan sa qualifiers.