“Oplan panindot sa palibot” ilusad sa Dakbayan sunod Semana

CEBU, Philippines — Ang pagpananom og daghang kahoy , ug pagdugang og ornamental plants sa mga bakanteng lugar sa Dakbayan sa Sugbo maoy pipila sa mga nag-unang plano  sa bag-ong giumol nga "Oplan Panindot sa Palibot".

Ang maong programa gikatakdang ilusad sunod semana ug ang first lady sa dakbayan nga si Malou Rama maoy modumala niini kauban sa pag-abag ni Arlie Gesta sa Cebu City Environment and Natural Resources Office-CCENRO.Sa pakighinabi ni Gesta dinhi sa Banat News kagahapon, gipadayag niya nga duna gyuy maayong plano ang first lady sa pagpanindot sa Dakbayan.

Matud pa niya nga mohimo gyud sila og lapad nga koordinasyon ngadto sa 80 ka mga barangay alang sa maong programa.

Atol sa gihimo nila nga coordination meeting sa niaging adlaw kauban ang mga kapitan ug mga representante sa tanang barangay, nahisgotan ang paghatag og importansya sa mga kahoy ug tanom nga moalirong gyud sa Dakbayan.

Gihangyo ang mga barangay nga kun dunay bakanteng luna nga wala gamita, labing maayo nga himoon kini nga community park.

Suma pa ni Gesta nga ang community park usa sa mga lugar kun diin mag-relax ang katawhan ug makatabang usab kini sa pag-ani og mga bisita.

"Dako gyud kaayo og matabang ang mga barangay aron mosamot kanindot ang Dakbayan," matud pa ni Gesta.

Ilaha usab nga batokan ang bandalismo sa mga kural, ug ilaha nga hingosgan ang  mural painting.

Nahisgotan usab ni Gesta nga duna pud sila'y plano nga mag-umol og kompetisyon alang sa tanang barangay nga dunay kalabotan sa beautification program.

Kahinumdoman una nang gitahasan ni Cebu City Mayor Michael Rama ang first lady sa Dakbayan nga si Malou nga motabang sa beautification.

Sa nangaging interview sa Banat News ngadto sa mayor ,  gibutyag niya nga  walay pagduha-duha ang iyang asawa sa pagsanong sa iyang hangyo sanglit niduyog usab kini sa iyang tingoha nga masusama sa Singapore ang Dakbayan sa Sugbo.

Mapasalamaton si Rama sa iyang asawa nga giubanan siya niini sa pagkab-ot sa iyang damgo alang sa Dakbayan. (BANAT NEWS)