Drivers ug vendors nagpanagana sa cashless payments

CEBU, Philippines — Nagpanagana pa gihapon ang mga drayber ug mga manindahay sa dakbayan sa Lapu-Lapu sa paggamit sa cashless transaction nga programa nga gitanyag sa gobyerno.

Kahinumduman ang kagamhanan sa dakbayan sa Lapu-lapu nakig-alayon sa Bangko Sentral ng Pilipinas ingon man sa Department of the Interior and Local Government aron itanyag ang programa alang sa cashless transactions diha sa mga establisamento sa dakbayan ingon man sa transportasyon nga sugdan karong Pebrero 17, 2023.

Sugod niadtong Pebrero 3 ang kagamhanan sa siyudad nihimo og information drive ug midasig sa mga manindahay ingon man sa mga drivers nga mopahimulos sa maong programa nga gitawag og Paleng-QR PH Program.

Si Carlos Recta, 55  anyos nga taga Barangay Basak, Siyudad sa Lapu-Lapu nga usa  ka traysikol drayber miingon nga  nakadayeg gyud unta siya sa maong  programa apan nagduha duha siya sa paggamit niining maong pamaagi sa pagkolekta sa plitehan sa ilang mga pasahero.

Gitataw niya nga dili na kinahanglan nga sagopon nila ang maong sistema tungod kay naandan na man nga motunol lang ang pasahero sa ilang plitehan ilabi na gayod sa mga traysikol.

Samtang si Maria Labastida nga usa ka vendor miingon usab nga ang paggamit sa cashless nga pamaagi angayan nga gamiton lang sa mga dinagko nga transaksyon.

Gitataw niya nga ginagmay lamang ang kantidad sa ilang transaksyon sa mga vendors    busa dili na gyud kinahanglan ang cashless transaction.

Sa nasayran tumong  sa maong programa mao ang pagdasig og suporta sa paggamit sa digital payments sa mga manindahay ug ubang negosyante apil na ang mga drivers dili lang sa siyudad sa Lapu-Lapu kundili sa ubang mga munisipalidad lukop nasud. /MEL(BANAT NEWS)