Barangay kapitan nadakpan sa tigbakayan
CEBU, Philippines — Upat ka mga tawo lakip niini ang usa ka barangay kapitan ang nasikop sa Oplan Bolilyo nga operasyon batok sa mga sugarol ubos sa P.D. 449 o Illegal Cockfighting as amended by P.D. 1602 niadtong Huwebes sa hapon diha sa Sitio Ylaya, Barangay Panalipan, Lungsod sa Catmon.
Ang mga nasikop mao sila si Barangay Panalipan Barangay Captain Marlon Rule, 47, nga mao say gitumbok nga operator sa maong tigbakayan, Steven Olingay, 37, taga Barangay Panagatan, Sogod nga maoy kuyme; Denis Cabahug, 42, taga Barangay Bawo, Sogod ug Francis Geonzon, 38, taga Barangay Flores, Catmon nga nanugal sa tigbakay.
Nangulo sa maong operasyon mao si Police Major Nazarino Emia, Provincial Unit sa CIDG Cebu uban sa PIU CPPO ug Catmon Municipal Police Station.
Hiniusa kini nga operasyon batok sa anti-illegal gambling nga niresulta sa pagkasikop sa maong dinakpan nga naaktohan gayud nagsabong gawas sa dili lisensyado nga cockpit arena. Adunay pipila nga sugarol ang nakaeskapo.
Nasakmit gikan sa maong operasyon ang buhi ug patay nga manok, mga buwang, calculator, ballpen, carbon paper, tally sheets, dul-an sa P8 mil nga kita sa ilegal nga sugal.
Ang mga dinakpan gidala sa Catmon Municipal Police Station alang sa pagpasaka og kaso. — /IBM (BANAT NEWS)
- Latest
