Nursing student nga nitabang hataga’g scholarship

CEBU, Philippines — Hatagan og scholarship sa presidente sa University of Cebu(UC) Atty. Augusto Go ang usa sa ilahang nursing student nga dako og natabang sa kaluwasan sa usa ka ginang nga biktima sa pagpanunggab.

Ang 54 anyos nga si Bernadetta Zamora gidunggab ang liog sa iyahang kapuyo niadtong Enero 30, 2023 diha sa dalan Osmeña Boulevard, siyudad sa Sugbo samtang kini naninda sa aseras.

Gibutyag ni Mercy Milagros Apuhin, Dean sa College of Nursing sa University of Cebu Banilad Campus dako gyud kaayo nilang garbo sa tunghaan ang bayanihong gihimo sa ilang mga tinun-an.

Si Go mohatag og scholarship kang Angyl Fayth Ababat, 21, second year student sa kursong nursing sa ilang College of Nursing- University of Cebu Banilad Campus.

Si Ababat mao ang tinun-ang naka-uniporme kauban ang usa ka laing babayeng tinun-an nga mitabang kang Zamora nianang adlawa. Matud ni Apuhin gipahibalo ni Go nga pasidunggan niini si Ababat pinaagi sa paghatag kaniya og scholarship. Apan si Apuhin miingon nga iyaha sab  i-endorsar si Kristianne Joice Noel Ona kinsa maoy kauban ni Ababat pagtabang kang Zamora, apan si Ona, wala mag-uniporme apan nagsuot lang kini sa iyang P.E. uniform anang tungora.

Gipaabot nga pasidunggan ang duha uban sa ilang mga ginikanan atol unya sa capping ceremony  karong Pebrero 21,2023 diha sa Waterfront Hotel and Casino ug uban pang pasidungog gikan sa nursing community.

Si Ababat, 21, misaysay nga niadtong petsa 30 siya ug iyahang classmate nga si Ona naa sa usa ka drug store aron mamalit sa mga gikinahanglan nila nga materyales.

Samtang naghuwat sa linya, ang suspek nga si Edwin Lumacad, 58, mibitad sa biktima ug giabis ang liog niini. Nagtuo sila nga nanulis lang ang suspek apan nakita nila ang biktima nga nagpugong sa dugo nga miawas sa liog.

Giangkon ni Ababat nagpanuko siya sa pagtabang kay dunay mas daghan pang mga edaran nga naa sa palibot ug nagtuo siya nga motabang sila, apan wala’y niduol maong siya nay nitabang sa biktima.

Gibutyag sab ni Ababat nga kauban niya sa pag-assist sa biktima si Ona. Wala lang maklaro si Ona adtong higayona tungod kay P.E. uniform ang gisul-ob niini.

Si Ona miingon una niining nahuna-hunaan nga manawag og ambulansiya sa pagtuo nga dunay motabang kang Ababat. Apan sa iyahang paglingi wala’y nitabang sa iyahang classmate hinungdan nga ni-assist siya niini samtang gisigehan niya og estorya ang biktima nga kalma lang kay nangaratol na sila.

Dugang ni Ona nga ang trabahante sa drug store nitabang sab pinaagi sa paghatag og gauze aron mahunong ang pagdugo.

“Nakuhaan amoang kakulba ato kay we know na stop namo and na secure ra namo nga dili siya mag bleed og maayo, didto ra mi gyud naghuwat mi sa ambulance nga moabot,” ni Ona pa.

Karong adlaw’ng Lunes atol sa flag raising ceremony sa Cebu City Police Office (CCPO) hatagan og pasidungog sa kapulisan silang Ababat  ug Ona sumala pa ni Police Lt. Col. Janette Rafter, Deputy City Director for Operations sa CCPO.

“We will also consider atong isa pud niya ka kauban atong panghitaboa because tungod sa ilang pagpakabana dako gyud kaayo og tabang, they played a significant role sa pagtabang sa biktima,” matud ni Rafter.

Anaa na karon sa luwas nga kahimtang ang biktima ug ang suspek napasakaan na sab og kasong frustrated murder in relation to Republic Act 9262. — /IBM (BANAT NEWS)