1,200 kilong manok gisakmit sa NMIS-7 gikan sa Tabunok Public Market

CEBU, Philippines — Sobra sa 1,200 ka kilo nga manok ang nakumpiska sa mga sakop sa National Meat Inspection Service (NMIS) diha sa merkado sa Tabunok sa Barangay Tabunok, Dakbayan sa Talisay niadtong miaging semana tungod sa mga kalapasan sa hustong paghipos niini.

Si Engr. Arnie Dela Torre, market administrator sa siyudad miingon nga nibisita lang ang grupo sa NMIS-7 sa merkado sa dihang ilang naabtan ang usa ka van nga naghatud og manok nga ibaligya sa merkado nga kwestyonable ang rehistro.

Tungod niini, gihapit sa grupo sa pag inspeksyon ang maong van ug nakita nga wala marehistro ang maong van sa ilang buhatan. Nasuta sab nga dili kini refrigerated van apan gikaragan og preskong inihaw nga mga manok.

Ang mga karne sama sa manok kinahanglang ikarga lamang sa mga refrigerated van ug kinahanglan sab nga rehistrado kini sa NMIS, aron pagsiguro nga ang maong mga karne nga ibaligya sa kamerkadohan luwas kaonon sa mga konsumidor.

Tanang mga karne nga miagi sa NMIS nakasiguro nga luwas kan-on tungod kay miagi kini og checkup sa mga beterenaryo ayha ihawon ug pinasubay tanan sa kalimpyo ang paghatud niini gikan sa mga ihawan ngadto sa kamerkadohan.

Human sa pagsakmit, nipahibalo ang NMIS-7 sa buhatan sa kapolisan sa siyudad aron ma-rekord ang pagsakmit nila sa maong mga karne alang sa hustong pagdispatsar niini.

Si Dela Torre nitataw nga aron kalikayan ang panghitabo magbutang na sila og taga NMIS sa merkado nga maoy magmonitor sa mga baligya nga karne sa maong dapit.

Sigon pa niya nga mao nasab kini magpahinumdom sa mga negusyante kung unsa ang ilang ipangrehistro sa ilang buhatan aron malikayan ang pagka alkansi sa negusyo. — /IBM (BANAT NEWS)