PRO-7 maghuwat sa CCJ nga modangop kanila alang sa imbestigasyon

CEBU, Philippines — Si Police Lieutenant Colonel Gerard Ace Pelare, tigpamaba ni Police Brigadier General Jerry Bearis, direktor sa Police Regional Office-7 nagkanayon nga maghuwat sila nga ang Cebu City Jail Male Dormitory modangop kanila alang sa imbestigasyon nga himuon mahitungod sa kontrobersiya nga ilang giatubang.

Sayo pa, usa ka kanhi Person Deprived of Liberty (PDL) sa CCJ ang nialegar nga giingong adunay pipila ka mga BJMP personnel ang nalambigit sa pagpalusot og kontrabando sa maong pasilidad sama sa cellphone.

Matud ni Pelare nga ang maong hitabo usa ka internal matter ug giingong naglambigit kini og  BJMP personnel hinungdan nga ang buhaton sa kapolisan mohimo sila og imbestigasyon subay  sa request sa BJMP.

Giklaro ni Pelare nga andam sila mohimo og imbestigasyon niini ilabi na kon ilaha kining ma co-relate sa contraband.  Sa pagkakaron, ang kanhi inmate nga nialegar anaa pa sa kustodiya sa kapolisan human kini nadakpan sa niaging operasyon ug gipasalig sa mga polis nga i-secure nila ang informant.

Subay sa maong hitabo, ang tigpamaba sa CCJ Jail Officer 3 Blanche Aliño nagkanayon nga dako og tabang kong madugangan ang mga ekipo sa Cebu City Jail Male Dormitory alang sa inspection sa mga gamit nga mosulod sa maong pasilidad.

Pipila sa mga kagamitan nga gikinahanglan sa maong pasilidad aron masusi ang mga gamit nga ipasulod diha sa city jail mao ang x-ray sama sa gigamit sa airport ug dugang nga scanners. (BANATNEWS)