Truck ban ipatuman sa Carmen sa Enero 22-23

CEBU, Philippines — Tungod sa gipaabot nga grabeng trapiko sa lungsod sa Carmen ini’g Enero 22, 2023 nunot sa Sinulog sa Carmen, adunay ipatumang truck ban sa boundary sa Danao-Carmen ug boundary sa Carmen ug Catmon sugod 12:01 sa kaadlawon sa Enero 22 hangtod 12:01 kaadlawon sa Enero 23, 2023.

Apil sa truck kadtong mga sakyanan nga six-wheeler pataas base sa memorandum nga giluwatan ni Gobernador Gwen Garcia penetsahan Enero 16, 2023.  Giawhag ni Garcia nga estrikto kining ipatuman.

Ang street dancing sa Sinulog sa Carmen magsugod ala 1 sa hapon sa Enero 22, 2023. Ang ritual showdown sa local category magsugod alas 3 sa hapon samtang ang ritual showdown sa ritual category lakip na sa Festival Queen magsugod alas sa gabii didto sa Carmen Grandstand.

Sumala sab sa Carmen Cebu Tourism Office nga libre kini sa mga gusto nga mosaksi sa maong kalihokan.  Niadtong Enero 14, nihimo na og inspeksyon si Garcia sa venue sa ritual showdown.

Ang lungsod mosaulog sa Sinulog sa Carmen sa ika-50 ka tuig karong tuiga.

Ang Talisay City Government mipadayag na sa kaandam niini pagsalmot.

Ang Tourism Officer Head na si Mikki Aznar, nitug-an nga moadto sila karon adlawa Enero 18, 2023 Miyerkules sa lungsod sa Carmen aron susihon ang kapuy-an sa Talisay City contingent.

Dugang pa ni Aznar, ang Talisay City contingent mopatighug na sa Carmen karon Biyernes aron adunay kahigayonan nga maka practice sa ilang performance adlaw nga Domingo.

Ang contingents sa Talisay usa sa siyam ka contingents sa probinsiya sa Sugbu nga miatras sa Sinulog Grand Parade and showdown sa Cebu City tungod sa kabalaka sa kaluwasan sa mga sakop niini sa venue diha sa South Road Properties, ang grupo nihalad og sayaw ngadto sa Santo Nino Parish Mohon sa Talisay City anang adlawa.

Sa pikas bahin, ang Cebu City Police Office pinaagi ni Police Colonel Ireneo Dalogdog nga andam kining mopadala og augmentation force kun gikinahanglan didto sa Lungsod sa Carmen sama sa gihimo sab sa kapolisan sa probinsya pagtabang kanila sa pagbantay sa Pista Senyor ug Sinulog niadtong nakalabay nga Enero 13-15. —Rowena D. Capistrano, Decemay Padilla (BANATNEWS)