Fluvial procession  malampuson nga napahigayon

CEBU, Philippines — Wala’y mga natala nga bati nga mga insidente ang Kapulisan sa siyudad sa Sugbo subay na sa fluvial procession ug pagbalhin sa imahe sa Sr. Sto. Niño ug Birhen sa Guadalupe gikan sa Lapu-Lapu City pabalik sa Basilica Minore del Sto. Niño sa Cebu City.

Matud ni Police Col. Ireneo Dalogdog, Director sa Cebu City Police Office(CCPO) nga bisan pa man sa kadaghan sa mga tawo nga nagpaabot sa Sr. Sto. Niño ug Birhen sa Guadalupe hapsay ra ang kalihukan.

Makita matod pa kun unsa ka hugot ang debosyon sa mga Sugbuanon ngadto sa Balaang Bata. Sigon ni Dalogdog miingon ang mga Police Station Commanders wala’y nadawat ng report nga dunay nabiktima sa pagpanguot ug uban pang krimen.

Apan gihimug-atan niini nga ang mga police station commanders padayon nga nag-monitor aron wala mabiktima sa mga badlungon sa katilingban.

Si Commander Mark Larsen Mariano Philippine Coast Guard sa Central Cebu miingon nga 400 ngadto sa 500 ka mga nagkadaiyang sakyanan sa kadagatan ang misalmot sa fluvial procession.

Kini bisan pa og 181 lang ang opisyal nga nagparehistro nga mokuyog sa prosisyon, duna gyuy mga gagmay nga mga sakyanan sa dagat nga dili makapasar sa gipangayong rekisitos alang niadtong nagparehistro, nga gusto gyud motuman sa ilang panaad bisan sa gawas lang sa panon sa prosisyon.

Gikan sa National Shrine of Saint Joseph sa Siyudad sa Mandaue gidala ang imahen ni Senior Santo Niño kauban sa imahen sa Birhen sa Guadalupe ngadto sa National Shrine sa Birhen sa Regla  sa Siyudad sa Lapu-Lapu pinaagi sa traslacion.

Gisugat sa liboan ka mga deboto nga mga Oponganon ang mga imahen sayo ug daghan sab ang nagatang sa motorkada niini padung sa Barangay Looc diin nanukad ang fluvial procession.

Si Father Joseph Robert Ga nga maoy parish priest sa simbahan sa Birhen sa Regla maoy midumala sa misa alas 4 ang takna sa kaadlawon.

Ang mga imahen gisakay sa BRP Cabra sa Philippine Coastguard nga maoy nagsilbing galeyon pabalik sa Sugbu.— Romeo T. Limpangog (BANATNEWS)