Esparis: Walay tugotan nga reservation sa Devotee City

CEBU, Philippines — Ang accommodation sa Devotee City diha sa kilid sa Fort San Pedro magpabilin diin  first-come, first-serve basis ug walay tugotan nga reservation matud ni  Konsehal Francis Esparis kinsa maoy in-charge niini.

Nasayran nga 300 lang ka individual ang ma-accommodate sa Devotee City tungod sa limitadong hinungdan nga ipatuman ang “first-come, first-serve” basis nga sestema. “Dili lang ta modawat og reservation kay mapuno na unya diha unya ang mga actual na nga mga tawo nga moadto didto di na nuon ma accomodate…First come, first serve basis ang atong pagabuhaton”, padayag ni Esparis.

Libre ang Devotee City alang sa mga out-of-town nga deboto ni Santo Niño nga dili makaabot sa pagpa-book og hotel o walay mga paryente nga mapuy-an sa siyudad. Nagkanayon si Esparis nga anaa na ang tanang materyales lakip na ang 20 ka container vans, portalets, folding beds ug tent. Gibutyag ni Esparis nga usa ka entablado nga adunay imahen sa Santo Niño ang ipahimutang usab diha sa lugar.

Si Esparis nanghinaot nga mahuman na ang pag-set up sa lugar ugma o usa ka adlaw sa dili pa ang pagbukas niini.

Ang nahisgotang Devotee City moabli sa registration niini alang niadtong gustong mo-avail sa libreng accommodation sugod sa alas 7:00 sa buntag karong Biyernes apan temporaryong mohunong sa alas 10:00 sa buntag alang sa Santos nga Misa ug ribbon cutting ug human sa maong kalihokan ipadayon ang registrion.

Nasayran nga aduna nay mga establisamento ang nipasalig nga manghatag og pagkaon alang sa mga out-of-town nga mga deboto atol sa ilang pagpuyo sa Devotee City. —Caecent No-ot Magsumbol (BANATNEWS)