Palma: Jesus Nazareno simbolo sa pag-antos

CEBU, Philippines — Gipahigayon ni Archbishop Jose Palma uban sa mga kaparian sa Archdiocese of Cebu kagahapon sa buntag ang misa pontipika subay sa kasaulogan sa kapistahan sa Black Nazarine diha sulod sa Cebu Archdiocesan Shrine of Jesus Nazareno sa Barangay Cansojong, Dakbayan sa Talisay diin nidagsa ang mga deboto niini.

Lakip sa nitambong sa maong kalihokan si Mayor Gerald Anthony “Samsam” Gullas, Jr. kinsa mao usab ang napili nga Hermano Mayor uban sa kapikas niini nga Kongresista Rhea Gullas isip Hermana Mayor 2023 apan wala makatambong tungod sa mga kalihokan usab niini.

Si Palma, sa iyang wali nipadayag kini nga si Jesus Nazareno ang simbolo sa pag-antos ug pagsakripisyo alang sa kaayohan ug kaluwasan sa kadaghanan.

Matud ni Palma nga wala man nakigpunsisok sa kadaghang deboto ngadto sa kaulohan ang mga tawo apan ang pagpangita ug panahon aron makasimba usa na kini ka sakripisyo.

Usa sa deboto sa Jesus Nazareno si Remedios Cabintoy, 78-anyos kinsa wala makapugong sa iyang paghilak human nakamtabong sila sa misa pontipika diin sulod sa kapin sa duha ka tuig wala nila mahimo tungod sa COVID-19 pandemic ug usa usab siya ka senior citizens.

Mapasalamaton si Cabintoy tungod kay bisan sa mga katalagman nga nangagi sama sa bagyong Odette luwas gihapon ang iyang banay ug gani pipila sa iyang mga apo ang nangalagad sa simbahan.

Sa iyang bahin, si Gullas wala usab mobalibad dihang gikuha isip Hermano Mayor tungod kay mao usab kini ang iyang pagpakita og suporta sa kapistahan sa Jesus Nazareno ug dili lang kang Señor Santo Niño. (BANATNEWS)