Garbage traps ibutang sa kasapaan sa siyudad
CEBU, Philippines — Adunay plano karon ang kagamhanan sa siyudad sa Sugbo nga magbutang og mga garbage trap sa kasapaan ilabi na sa utlanan sa mga barangay.
Suma pa sa hepe sa Cebu City Agriculture (CAD) ug usa sa mga river commander nga si Joey Baclayon nga usa sa mga tumong niini aron madeterminar dayon kun diin nga area nagikan ang mga basura.
Sa pakighinabi ni Baclayon dinhi sa Banat News kagahapon, nipadayag kini nga duna na sila’y mga pasiuna nga lakang sa pagbutang og mga garbage trap sa kasapaan.
Apan karong tuiga,ilaha na kini nga hingusgan pinaagi sa pagbutang niini diha sa barangay boundaries.
“Pero bisan pa man nga naay garbage traps, wala nagpasabot nga labayan og basura ang kasapaan. Padayon ang atong pag-edukar sa katawhan nga dili gyud puwede labayan og basura ang atong kasapaan, matud pa ni Baclayon.
Adunay dugang diskusyon ang CAD kauban ang Department of Engineering and Public Works (DEPW) ug Cebu City Environment and Natural Resources Office (CCENRO) alang sa paghingusog sa pagmontar og garbage traps.
Subsob karon ang kampanya sa Dakbayan sa pagukod sa pagpataka og labay sa basura ingon man usab ang paghawan sa nakalapas sa tulo ka metros nga easement sa kasapaan.
Kahinumdoman dunay walo ka personalidad sa dakbayan sa Sugbo ang gitudlo isip commander sa matag sapa nga tipik sa kampanya sa Gubat sa Basura. Kini nga mga commander gihatagan og awtoridad sa paghimo og mga tigum sa mga opisyal sa barangay ug sa ilang gi-assign nga mga departamento, ingon man sa pag-supervise ug pagmonitor sa mga operasyon may kalabutan sa kalihokan sa rehabilitasyon sa sapa nga gidestino kanila.
Ang mga commander mao sila Atty. Gerardo Carillo sa Bulacao River; Grace Luardo, Kinalumsan River, Dr. Ester Concha, Tagunol Creek; Engr. Rolando Ardosa, Guadalupe River; Paul Gotiong, Mahiga River; Engr. Joey Baclayon, Lahug River; Raquel Arce, Estero Pari-an; ug Arlie Gesta sa Butuanon River. (BANAT NEWS)
- Latest
