Gang war sa pari-an, tulo napagan

CEBU, Philippines — ngol sa nahitabong pinusilay sa duh aka mga gangs sa mga batan-on diha sa Mabini Street, Barangay Pari-an sa siyudad sa Sugbo kagahapon sa buntag adlaw nga Biyernes.

Una niini, tulo ang nangaigo sa pinusilay ug usa sa mga naigo mao si Police Executive Master Sergeant Vincent Aguanta nga nadestino sa Consolacion Municipal Police Station nga igo ra nanglimpyo sa iyang sakyanan diha sa maong lugar.

Laing naigo mao sila si Donna Blair Banzon ug Anthony Corro nga padulong na unta mouli gikan nisimba sa Misa de Gallo. Ang tulo pulos lamang nangapagan sa maong gang war.

Ang tulo nalandig sa tambalanan apan kagahapon sa buntag, si Corro kinsa naigo sa likod ug ang bala gikatahong nilapos sa iyang kidney, nakabsan gyud sa kinabuhi sumala pa sa report.

Human sa maong insidente daling nihimo og follow up operation ang Pari-an Police Station 1 nga miresulta sa pagkasikop sa lima ka mga suspek nga giila nga sila si JR Jumao-as ,18; James Batarlo, 18;  Anthony Revilleza alyas Niño Barro 18; Ronald Revilleza, 27; April Boy Regala Turno 19; nga miyembro sa usa sa mga gang nga nagkagubot.

Ang hepe sa Pari-an Police Station 1 Major Efren Diaz miasoy nailhan ang mga suspek pinaagi sa mga witnesses nga nakuha nila.

Sa ilang follow-up operation nakakuha ang kapulisan og miyembro sa maong gang nga mitabang kanila ug nakasulod sa group chat sa mga dinakpan hinungdan nga sila natultolan ug nangadakpan.

Sigon sa opisyal,  sa lima nga nadakpan ang duha niini ang giingong gunmen nga sila si Anthony ug Ronald Revilleza.

Padayon pa ang imbestigasyon ug pagpangita sab sa laing duha ka gunmen nga miyembro sa pikas grupo nga daling nakaikyas.

Sa lain-laing lugar nadakpan ang mga suspek. Matud pa, babaye ang hinungdan ang panagbangi sa duha ka grupo. Si Police Col. Ireneo Dalogdog, Director sa Cebu City Police Office miingon nga dili pasayloon ang mga suspek ug pasakaan gyud og kasong alarm and scanal, frustrated murder ug murder.

Bisan tulo sa mga napagan pulos mga inosente, gipasalig ni Dalogdog nga luwas gihapon ang siyudad para sa tanan.

Ang Banat News dili tighingalan sa bisan unsang mga pangalan sa gangs sa mga kabataan nga nalambigit og mga krimen dinhi sa Sugbu. Subay kini sa hangyo kaniadto sa unang police city directors sa kapolisan aron nga dili pasikaton  ang maong mga grupo aron dili makadani pa og laing mga nahisalaag pang mga kabataan aron magpa-miyembro kanila. —/IBM (BANAT NEWS)